Famous Actress Death : तेजस्वी तारा हरपला; प्रसिद्ध अभिनेत्रीचे निधन, सिनेसृष्टी शोक सागरात बुडाली

मनोरंजन विश्वातून दुःखद बातमी समोर आली आहे. 'हीरोज' (Heroes) सीरिजमधील भूमिकांसाठी ओळखली जाणारी प्रसिद्ध अभिनेत्री हेडन पॅनेटीअर (Hayden Panettiere) हिचे दुर्दैवी निधन झाले आहे. अभिनेत्रीने वयाच्या ३६ व्या वर्षी अखेरचा श्वास घेतला.

एबीसी न्यूजला दिलेल्या निवेदनात अभिनेत्रीच्या प्रतिनिधीने तिच्या निधनाची धक्कादायक बातमी दुजोरा दिला. निवेदनात म्हटले आहे, "आमच्या लाडक्या हेडनच्या दुःखद निधनाची बातमी अत्यंत वेदनेने आम्ही कळवत आहोत. ती एक तेजस्वी व्यक्तिमत्त्व आणि अफाट ऊर्जा असलेली व्यक्ती होती. जिने तिला ओळखणाऱ्या सर्वांच्या आणि पडद्यावर तिला पाहणाऱ्या लाखो लोकांच्या आयुष्यात अपार प्रेम आणि आनंद आणला." हेडन पॅनेटीअरच्या मृत्यूचे नेमके कारणे अद्याप स्पष्ट झाले नाही.

TMZच्या वृत्तानुसार, अभिनेत्रीच्या जवळच्या एका सूत्राने सांगितले की, गेल्या वर्षभरात तिला पाठीच्या दुखण्याचा त्रास होत होता. अभिनेत्रीच्या निधनाने मनोरंजन विश्वावर शोककळा पसरली आहे. चाहते आणि कलाकारांनी सोशल मीडियाच्या माध्यमातून अभिनेत्रीवर श्रद्धांजली वाहिली आहे. तसेच अभिनेत्रीच्या जाण्याने कुटुंबावर दुःखाचा डोंगर कोसळला आहे.

हेडन पॅनेटीअर यांचे करिअर

अभिनेत्री हेडन पॅनेटीअर हिने बालकलाकार म्हणून आपल्या कारकिर्दीची सुरुवात केली आणि पुढे टेलिव्हिजन आणि चित्रपट क्षेत्रात मोठी कारकीर्द घडवली. २००६ ते २०१० या काळात चाललेल्या 'हीरोज' या लोकप्रिय साय-फाय मालिकेत 'क्लेअर बेनेट' ही भूमिका साकारून तिला आंतरराष्ट्रीय स्तरावर प्रसिद्धी मिळाली. त्यानंतर 'नॅशविल' (Nashville) या म्युझिकल ड्रामा मालिकेतील 'ज्युलिएट बार्न्स' या कंट्री सिंगरच्या भूमिकेसाठी तिला मोठी ओळख मिळाली.टेलिव्हिजनवरील कामासोबतच, पॅनेटीअरने 'रिमेंबर द टायटन्स', 'रेजिंग हेलेन', 'आइस प्रिन्सेस' आणि 'स्क्रीम ४' यांसारख्या अनेक महत्त्वाच्या चित्रपटांमध्येही काम केले.

हेडन पॅनेटीअरने 'किंगडम हार्ट्स' (Kingdom Hearts) मधील 'कायरी' (Kairi) आणि 'अंटिल डॉन' (Until Dawn) या हॉरर व्हिडिओ गेममधील 'सामंथा गिडिंग्ज' (Samantha Giddings) या पात्रांना आपला आवाजही दिला होता. या वर्षाच्या सुरुवातीला, पॅनेटीअरने तिचे आत्मचरित्र 'दिस इज मी: अ रेकनिंग' (This Is Me: A Reckoning) प्रकाशित केले.