Marathi Movie Trailer Video : "स्त्रिया एकत्र आल्यावर नुसत्याच 'गप्पा' नसतात..."; 'अगं अगं सुनबाई...' चा ट्रेलर पाहिलात का?

प्रसिद्ध मराठी अभिनेत्री निर्मिती सावंत आणि प्रार्थना बेहेरे एका नवीन चित्रपटातून प्रेक्षकांच्या भेटीला येणार आहे. त्यांचा 'अगं अगं सूनबाई! काय म्हणताय सासूबाई?' चित्रपट लवकरच रिलीज होणार आहे. नुकताच चित्रपटाचा ट्रेलर रिलीज झाला आहे. सध्या सर्वत्र या चित्रपटाची चर्चा पाहायला मिळत आहे. चित्रपटाच्या टीझर आणि शीर्षक गीताने प्रेक्षकांमध्ये उत्सुकता निर्माण केली होती. आता प्रेक्षकांच्या याच उत्सुकतेत भर घालायला ट्रेलर आला आहे. ज्यात निर्मिती सावंत आणि प्रार्थना बेहेरेचा अनोखा अंदाज पाहायला मिळणार आहे.

'अगं अगं सूनबाई! काय म्हणताय सासूबाई?' चित्रपट स्त्री सशक्तीकरणावर भाष्य करणारा आहे. सासू सुनेचं नाते हे अनेक कुटुंबात "तुझे माझे जमेना, तुझ्यावाचून करमेना" या प्रकारचे असते. तर काहींचे नाते "असून अडचण, नसून खोळंबा" अशा स्वरूपाचे असते. थोडक्यात, घरोघरी मातीच्या चुली अशी परिस्थिती असते. पण, यापलिकडे जाऊन त्यांच्यात एक भावनिक बंध असतो, जो त्यांच्या नात्याची वीण कधीच सैल होऊ देत नाही. अशाच काहीशा भावना मांडणारा चित्रपट म्हणजे 'अगं अगं सूनबाई! काय म्हणताय सासूबाई?'

'अगं अगं सूनबाई! काय म्हणताय सासूबाई?' चित्रपटाच्या ट्रेलरमध्ये पाहू शकता की, सासू -सुनेच्या नात्याचे केवळ आदर्श रूप नाही, तर त्यातील चांगले-वाईट पैलू, संघर्ष आणि भावनिक क्षणही प्रामाणिकपणे मांडण्यात आले आहेत. हसवत हसवत विचार करायला लावणारी ही कथा आहे. ही केवळ एक सासू-सूनेची गोष्ट नसून स्त्रियांची गोष्ट आहे. स्त्रियांनी एकमेकींना समजून, एकमेकींची साथ दिल्यावर त्या अधिक सक्षम आणि मजबूत होतील असा प्रभावी विचार या चित्रपटातून मांडण्यात आला आहे.

चित्रपटाची रिलीज डेट?

'अगं अगं सूनबाई! काय म्हणताय सासूबाई?' चित्रपटाचे दिग्दर्शन केदार शिंदे यांनी केले आहे. तर सना शिंदे, उमेश कुमार बन्सल यांची निर्मिती आहे. 'अगं अगं सूनबाई! काय म्हणताय सासूबाई?' चित्रपट 16 जानेवारीला थिएटरमध्ये पाहायला मिळणार आहे. दोन पिढ्या, दोन विचारधारा आणि दोन कणखर स्त्रिया यांच्यातील गोड–तिखट नातं पाहायला मिळणार आहे. चाहते या चित्रपटासाठी खूपच उत्सुक आहेत.