Sudipto Sen New Film Announce: ‘द केरला स्टोरी’नंतर सुदिप्तो सेन यांनी केली नव्या चित्रपटाची घोषणा, ट्विटरवरून दिली चाहत्यांना ‘गुड न्यूज’

Sudipto Sen Direct Subrata Roy's Biopic: सुदिप्तो सेन दिग्दर्शित ‘द केरला स्टोरी’ चित्रपटाने बॉक्स ऑफिसवर दमदार कमाई केली आहे. गेल्या महिन्यात प्रदर्शित झालेल्या चित्रपटाने एकंदरित बॉक्स ऑफिसवर २०० कोटींच्या पण पुढे कमाई केली आहे. महिन्याभरानंतर चित्रपटाच्या कमाईत घसरण होण्यास सुरुवात झाली आहे. ‘द केरला स्टोरी’ला मिळालेला उत्तम प्रतिसाद पाहून दिग्दर्शक सुदीप्तो सेन यांनी त्यांच्या दुसऱ्या चित्रपटाची घोषणा केली आहे..

सुदिप्तो सेन यांनी सोशल मीडियाच्या माध्यमातून नव्या चित्रपटाची घोषणा केली. सुदिप्तो सेन आणि निर्माते संदीप सिंह हे दोघेही एकत्र काम करणार असल्याची माहिती खुद्द दिग्दर्शक सुदिप्तो सेन यांनी दिली. सोबतच यावेळी ट्विटरवर माहिती देताना, हातात २५ हजार कोटींचा धनादेश धरलेल्या माणसाचा फोटो त्यांनी शेअर केला. व आपला आगामी चित्रपट हा ज्येष्ठ उद्योगपती सुब्रत रॉय यांच्या जीवनावर चित्रित केलेला चित्रपट असेल.

ज्येष्ठ उद्योगपती सुब्रत रॉय यांचा १० जून रोजी ७५ वा वाढदिवस होता. त्यांच्या वाढदिवसानिमित्त बायोपिकची घोषणा करण्यात आली. चित्रपटाचे नाव ‘सहाराश्री’ असून चित्रपटाचे दिग्दर्शन सुदिप्तो सेन करत असून चित्रपटाची निर्मिती संदीप सिंग, डॉ. जयंतीलाल गडा यांनी केली.

‘इंडिया टुडे’ने २०१२ या वर्षी सुब्रत रॉय यांना वर्षातील सर्वात प्रभावशाली व्यक्तिमत्व म्हणून घोषित केले होते. भारतातील अनेक तरुणांना रोजगाराच्या संधी उपलब्ध करून दिल्याने त्यांचा उल्लेख प्रतिष्ठित ‘टाइम’ मासिकातही करण्यात आला. चित्रपटाची कथा त्यांच्या संघर्षापासून ते देशातील सर्वात प्रभावशाली व्यक्ती बनण्याचा त्यांचा प्रवास उलगडणार आहे.

चित्रपटाचे गीतकार गुलजार असून चित्रपटातील संगीताची जबाबदारी ए.आर.रहेमान यांच्याकडे आहे. अद्याप तरी, सुब्रत रॉय यांची भूमिका कोण साकारणार याची माहिती गुलदस्त्यातच आहे. प्रमुख भूमिकेसाठी सध्या निर्माते बॉलिवूडमधील अनेक बड्या स्टार्ससोबत बोलत आहेत.