Mahak Chaudhary News : मूळची यूपीची, टॉलिवूड अन् बॉलिवूड आजमावले, आता ग्लॅमरस अभिनेत्री महाराष्ट्राच्या राजकारणात उतरली

सध्या राज्यात विधानसभा निवडणुकांचे वारे वाहत आहेत. एकीकडे सत्ताधारी आणि विरोधी पक्ष आमने सामने उभे आहेत. तर दुसरीकडे मनोरंजन विश्वातही निवडणुकीच्या पार्श्वभूमीवर हालचाली सुरू झाल्या आहेत. ऐन निवडणूकीच्या तोंडावर सिनेविश्वातील कलाकार राजकारणात एन्ट्री घेत आहेत. अभिनेते सयाजी शिंदे यांनी अजित पवार यांच्या राष्ट्रवादीत एन्ट्री घेतल्यावर आता महादेव जानकर यांच्या पक्षात देखील एका नव्या अभिनेत्रीने एन्ट्री घेतली आहे.

महक चौधरी असं या अभिनेत्रीचं नाव आहे. महक यांनी महादेव जानकर यांच्या राष्ट्रीय समाज पक्षात एन्ट्री घेतली आहे. नुकताच अभिनेत्रीचा जाहीर पक्ष प्रवेश पार पडला. महक रासपच्या मुंबई अध्यक्षा म्हणून कामे पाहणार आहेत, अशी माहिती मिळालीये.

महक चौधरी निवडणूक लढणार

पक्ष प्रवेश झाल्यानंतर आता महक चौधरी विधानसभा निवडणुकीच्या रिंगणात सुद्धा उतरणार अशी चर्चा आहे. महक यांनी स्वत: या बद्दल एक पोस्ट सोशल मीडियावर पोस्ट केली आहे. यामध्ये त्यांनी निवडणूक लढणार असल्याचे संकेत दिलेत. आगामी निवडणुकीत महक वर्सोवा मतदारसंघातून निवडणूक लढणार असल्याचं त्यांनी म्हटलं आहे.

काय आहे पोस्टमध्ये?

गीता कुमारी सिंह उर्फ महक चौधरी मला सांगायला आनंद होत आहे की, राष्ट्रीय समाज पक्षाच्या मुंबईच्या अध्यक्षपदी माझी निवड झाली आहे. तसेच आगामी विधानसभा निवडणुकीसाठी वर्सोवा मतदार संघातून मला पक्षाकडून तिकीट देण्यात आलं आहे. आजपर्यंत तुम्ही मला नेहमीच पाठिंबा दिला, यापुढेही असाच पाठिंबा मिळेल अशी अपेक्षा करते, असं महक चौधरीने यात म्हटलं आहे.

कोण आहेत महक चौधरी?

अभिनेत्री महक चौधरी मूळच्या उत्तर प्रदेशच्या आहेत. त्यांनी साऊथ इंडस्ट्रीतून फिल्मी करिअरची सुरुवात केली. २०१५ मध्ये त्यांचा पहिला चित्रपट प्रदर्शित झाला होता. साऊथमध्ये काम केल्यानंतर महक यांनी बॉलिवूडमध्येही काम केल आहे.