Actor Death : लोकप्रिय अभिनेत्याचे निधन, वयाच्या ५५ व्या वर्षी मालवली प्राणज्योत

Ashish Warang : मनोरंजन विश्वातून एक दु:खद बातमी समोर आली आहे. अभिनेते आशिष वारंग यांचे निधन झाले आहे. त्यांनी वयाच्या ५५ व्या वर्षी शेवटचा श्वास घेतला. आशिष यांचे भाऊ अभिजीत वारंग यांनी सोशल मीडियावर भावनिक पोस्ट शेअर करत ही माहिती दिली. आशिष वारंग हे मराठीसह हिंदी चित्रपटांमध्ये झळकले होते. सूर्यवंशी, सिंबा, सर्कस, मर्दानी अशा अनेक हिंदी सिनेमांमध्ये त्यांनी काम केले.

काही दिवसांपूर्वी अभिनेत्री प्रिया मराठेचे कर्करोगामुळे निधन झाले. त्या धक्क्यातून सावरत असताना मनोरंजन सृष्टीला आणखी एक धक्का बसला आहे. मराठी-हिंदी चित्रपटांमध्ये काम करणारे अभिनेते आशिष वारंग यांची प्राणज्योत मालवली आहे. ते मागील काही काळापासून आजारी होते, अशी माहिती सूत्रांकडून मिळाली आहे.

आशिष वारंग यांचे बंधू अभिजीत वारंग यांनी सोशल मीडियावर पोस्ट शेअर केली आहे. या पोस्टमध्ये अभिजीत यांनी 'आशिष दादा, आम्ही तुला नेहमी खूप मिस करु. आधी तू हवाई दलात अधिकारी म्हणून देशाची सेवा केलीस आणि नंतर अभिनय कौशल्याने मनं जिंकलीस', असे म्हटले आहे.

आशिष वारंग यांच्या अभिनयाचा प्रवास खूप खास होता. सिनेसृष्टीमध्ये प्रवेश करण्यापूर्वी त्यांनी भारतीय हवाई दलात अधिकारी म्हणून देशाची सेवा केली होती. त्यानंतर त्यांनी अभिनयक्षेत्रामध्ये काम करण्यास सुरुवात केली. रोहित शेट्टीच्या 'सूर्यवंशी' चित्रपटात ते 'आशिष तांबे' या भूमिकेत दिसले होते. सूर्यवंशी व्यतिरिक्त एक व्हिलन रिटर्न्स, दृश्यम, सिंबा, सर्कस, मर्दानी अशा चित्रपटांमध्ये आशिष यांनी काम केले. याशिवाय ते प्रसिद्ध वेब सिरीज 'द फॅमिली मॅन' मध्येही झळकले होते.