VIDEO : आई-वडिलांना भेटून परतताना आक्रित घडलं, सख्ख्या लहान भावाने मोठ्या भावाला संपवलं; आई-बापाचं काळीज जळालं

संजय राठोड, साम टिव्ही

यवतमाळ : यवतमाळच्या पिंपळगाव येथे लहान भावाने मोठ्या भावाची निर्घृण हत्या केल्याचा धक्कादायक प्रकार समोर आला आहे. प्रमोद पेंदोरे असं मृत व्यक्तीचं नाव आहे. हत्येची ही घटना मोबाईल कॅमेऱ्यात चित्रित झाली असून, लोखंडी रॉडने आरोपी कवीश्वर हा आपल्या सख्ख्या मोठा भाऊ प्रमोदला भर वर्दळीच्या रस्त्यात मारताना दिसत आहे. यावेळी शेजारूनच अनेक नागरिक ये-जा करीत असले तरी कुणीही मदतीला धावताना दिसत नाही. सध्या हा व्हिडिओ सोशल मीडियावर प्रचंड व्हायरल होत असून, घटनेतील आरोपीाला शहर पोलिसांनी अटक केली आहे.

कौटुंबिक वादातून लहान भावाने लोखंडी रॉडने मोठ्या भावाच्या डोक्यावर प्रहार करून त्याची हत्या केली. ही घटना यवतमाळ शहरातील बालाजी मंगल कार्यालय पिंपळगाव येथे घडली. या घटनेनं परिसरात चांगलीच खळबळ उडाली असून सध्या या घटनेचा व्हिडिओ सोशल मीडियावर प्रचंड व्हायरल होत आहे. प्रमोद पंढरीनाथ दिंडोरे (वय ३५, रा. तिरुपती नगर पिंपळगाव) असं मृतकाचं नाव आहे. तर कवीश्वर पंढरी पेंदोरे (वय ३४, रा. तिरुपती नगर पिंपळगाव) असं आरोपी भावाचं नाव आहे. मृतक प्रमोद याने २०१७मध्ये आंतरजातीय प्रेमविवाह केला होता. तेव्हापासून तो भाड्याने रूम करून राहत होता. आई-वडिलांना भेटून परतीच्या मार्गावर असताना सायंकाळी पिंपळगाव येथील बालाजी मंगल कार्यालयाजवळ लहान भाऊ प्रमोद याने लोखंडी रॉडने सपासप वार करून ठार केलं. दरम्यान, घटनेतील आरोपीला शहर पोलिसांनी अटक केली आहे.

अड्ड्यावरील कामगारांकडून बेदम मारहाण

दरम्यान, नागपूरमध्ये देखील अशीच एक हत्येची घटना समोर आली आहे. दारू पिण्यासाठी गेलेल्या तरूणाच्या हातातून दारूचा ग्लास खाली पडून फुटल्याच्या कारणावरून गुत्त्यावरील कामगारांनी त्याला बेदम मारहाण केली. या मारहाणीत त्याचा जागीच मृत्यू झाला. ही धक्कादायक घटना नागपुरातील खडगाव मार्गावरील सायरे देशी दारूगुत्त्यावर घडली असून, या घटनेनंतर पोलिसांनी पाच आरोपींविरोधात गुन्हा दाखल केला. तसेच चौकशी करून पाच आरोपींना अटक केली.