Shocking Crime : वॉर्ड बॉयने मला घाण इशारा केला, झोपेत वाईट स्पर्श; महिला रुग्णाने सांगितला 'त्या' रात्रीचा घटनाक्रम

चंदौली : उत्तर प्रदेशातील चंदौली जिल्ह्यात एक धक्कादायक घटना समोर आली आहे. पंडित कमलापती त्रिपाठी जिल्हा रुग्णालयात भरती झालेल्या महिला रुग्णानं वॉर्ड बॉयवर धक्कादायक आरोप केले आहेत. वॉर्ड बॉयने बाथरुममधून मला इशारे करत शरीरावर स्पर्श केल्याचा आरोप केला आहे. ही घटना समोर आल्यानंतर रुग्णालयात एकच खळबळ उडाली आहे. मुख्य वैद्यकीय अधीक्षकांनी आरोपींवर कठोर कारवाईचे आश्वासन दिलं आहे.

मिळालेल्या माहितीनुसार, चांदौली जिल्हा मुख्यालयातील पंडित कमलापती त्रिपाठी संयुक्त जिल्हा रुग्णालयात गेल्या तीन-चार दिवसांपासून एका महिलेवर उपचार सुरू होते. यावेळी पीडित रुग्णाने वॉर्ड बॉयवर अत्याचार केल्याचा आरोप केला. घटनेची माहिती मिळताच रुग्णालयाचे मुख्य अधीक्षक डॉ. एसपी सिंह तात्काळ वॉर्डमध्ये पोहोचले. त्यांनी पीडित आणि तिच्या कुटुंबियांशी सविस्तर चर्चा करत आरोपींवर कठोर कारवाई करण्याचं आश्वासन दिलं.

पीडित महिला रुग्णाने रुग्णालयातील वॉर्ड बॉयवर धक्कादायक आरोप केले असून पीडितेनं सांगितलं की, 'आम्ही रात्री झोपलो असताना, एका तरुणाने बाथरुममधून इशारा करत मला हाक मारली'. पीडितेच्या म्हणण्यानुसार, ती झोपी गेली असताना तो मुलगा तिच्याकडे आला आणि तिच्या शरीरावर वाईट स्पर्श करु लागला, पीडितेनं स्पष्टपणे सांगितलं की, 'त्याने माझ्यासोबत वाईट कृत्य केलं'.

संबंधित प्रकरणात आता पंडित कमलापती त्रिपाठी जिल्हा रुग्णालयाचे मुख्य वैद्यकीय अधीक्षक डॉ. एसपी सिंह यांनी प्रतक्रिया दिली आहे. 'पीडित तरुणी रुग्णालयातील कर्माचाऱ्याने गैरवर्तन केल्याचं समोर आलं आहे'. ते पुढे म्हणाले की, 'हे कळताच मी घटनास्थळी चौकशी केली आणि या संदर्भात जे प्रकरण दिसून आलं त्याची चौकशी केली जात आहे'.