Tuljapur Tragedy: "माझ्यावर प्रेम कर नाहीतर...", छेडछाडीला कंटाळून पोलिसाच्या मुलीनं गळफास घेतला

बालाजी सुरवसे, धाराशिव प्रतिनिधी

Tuljapur Crime News : तुळजापूरमध्ये छेडछाडीला कंटाळून पोलीस कॉन्स्टेबलच्या मुलीने आत्महत्या केल्याची धक्कादायक घटना घडली आहे. माझ्या प्रेम कर, लग्न कर नाहीतर... असे म्हणत आरोपीकडून तिला वारंवार धमकी देण्यात येत होती. त्यामुळे १५ वर्षीय सारिका शिकारे हिने टोकाचा निर्णय घेतला. याप्रकरणी मुलीच्या आईच्या तक्रारीवरून पोलिसांत गुन्हा दाखल करण्यात आला आहे. तुळजापूर पोलिसांकडून या प्रकरणाचा तपास केला जात आहे.

तुळजापूरमधील शहरातील पोलीस कॉर्टर एस.टी. कॉलनीत राहणाऱ्या १५ वर्षीय सारिका शिकारे या पोलीस कॉन्स्टेबलच्या मुलीने छेडछाड आणि धमकीला कंटाळून राहत्या घरी गळफास घेऊन आत्महत्या केल्याची धक्कादायक घटना घडली. या प्रकरणी तुळजापूर पोलीस स्टेशनमध्ये दोन आरोपींविरुद्ध गुन्हा दाखल करण्यात आला आहे. सारिकाच्या आईच्या फिर्यादीनुसार, आरोपी ओंकार कांबळे आणि नगिना शशिकांत पांडागळे यांनी सारिकाला सातत्याने त्रास दिला. ओंकारने सारिकाला "माझ्यावर प्रेम कर, लग्न कर, नाहीतर सोशल मीडियावर तुझी बदनामी करेन" अशी धमकी दिली होती. तसेच, त्याने बंदुकीने मारण्याची धमकी देखील दिली होती. या सततच्या मानसिक त्रासाला कंटाळून सारिकाने टोकाचा निर्णय घेतला.

ओंकार कांबळे याच्यावर यापूर्वीही सोशल मीडियावर बंदूक घेऊन दहशत निर्माण करणारा व्हिडिओ व्हायरल केल्याप्रकरणी गुन्हा दाखल आहे. या घटनेने परिसरात खळबळ उडाली असून, पोलिसांनी दोन्ही आरोपींविरुद्ध कठोर कारवाईचे आश्वासन दिले आहे. पोलिसांनी या प्रकरणाचा तपास सुरू केला असून, आरोपींना लवकरात लवकर अटक करण्याचे प्रयत्न सुरू आहेत. स्थानिक नागरिकांनी या घटनेचा तीव्र निषेध व्यक्त केला.