Abhishek Ghosalkar Firing: महाराष्ट्रात चाललंय काय? ठाकरे गटाच्या माजी नगरसेवकावर गोळीबार, झाडल्या तीन गोळ्या

(सचिन गाड, मुंबई)

Abhishek Ghosalkar Firing In Dahisar :

ठाकरे गटाचे माजी नगरसेवक अभिषेक घोसाळकर यांच्यावर गोळीबार झाल्याची घटना घडलीय. अभिषेक यांच्यावर करुणा रुग्णालयात उपचार सुरू असून शिवसेना नेते अनंत गिते त्यांची भेट घेण्यासाठी रुग्णालयात दाखल झाले आहेत. हाती आलेल्या माहितीनुसार, अभिषेक घोसाळकर यांना तीन गोळ्या लागल्याची माहिती मिळत आहे. घोसाळकर हे ठाकरे गटाचे दहिसरमधील माजी नगरसेवक आहेत. दहिसरमध्ये गोळीबार झाल्याने राज्यात खळबळ उडालीय. (Latest News)

ठाकरे गटात असलेले विनोद घोसाळकर यांचे पुत्र अभिषेक घोसाळकर यांच्यावर गोळीबार झाला आहे. पैशाच्या वादातून मॉरिस नावाच्या व्यक्तीने हा हल्ला केल्याचं सांगितले जात आहे. घोसळकर यांच्यावर गोळ्या झाडल्यानंतर मॉरिसने स्वतःच्या डोक्यात गोळी झाडून आत्महत्या केलीय. अभिषेक घोसाळकर यांना तीन गोळ्या लागल्या असून त्यांचीही प्रकृती गंभीर असल्याचं सांगितलं जात आहे. घोसळकर यांना कार्यालयात बोलून त्यांच्यावर गोळीबार करण्यात आल्यांच सांगितलं जात आहे.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

आपआपसातल्या वादातून गोळीबार झाल्याचं सांगितलं जात आहे. यापूर्वी उल्हासनगर येथे पोलीस स्टेशनमध्ये भाजप आमदार गणपत गायकवाड यांनी शिंदे गटाचे महेश गायकवाड यांच्यावर गोळीबार केला होता, यामुळे महाराष्ट्रात चाललंय काय असा प्रश्न पडत आहे. दरम्यान अभिषेक घोसाळकर यांना करूणा रुग्णालयात उपचारासाठी दाखल करण्यात आलं आहे. ठाकरे गटाचे नेते आमदार आदित्य ठाकरे त्यांच्या प्रकृतीची माहिती घेण्यासाठी रुग्णालयात पोहोचणार आहेत.

मिळालेल्या माहितीनुसार अभिषेक घोसाळकर गोळीबार होण्यापूर्वी एका कार्यक्रमात सहभागी झाले होते. मॅरिस त्यांच्यावर गोळ्या झाडण्याआधी दोघांनी फेसबुक लाईव्ह केलं. दोघांनी सोबत काम करणार असल्याचं सांगितलं. त्यानंतर मॅरिसहा उठून बाजुला झाला. त्यानंतर अभिषेक घोसळकर यांच्यावर गोळीबार केला. तब्बल ५ गोळ्या झाडण्यात आल्या यातील तीन गोळ्या घोसळकर यांना लागल्या आहेत. घोसाळकर यांच्यावर गोळ्या झाडल्यानंतर मॉरिसने स्वतःच्या डोक्यात गोळी मारून घेतली. त्याने हा गोळीबार त्याच्याच कार्यालयात केला. मॉरिस दहिसर- बोरिवली परिसरात स्वयंसेवी संघटना चालवत असल्याची माहिती आहे.