Shocking: अंगाई गीत गायलं, मांडीवर झोपवलं नंतर...; आईनेच घेतला पोटच्या चिमुकलीचा जीव

राजस्थानच्या अजमेरमध्ये आईने पोटच्या मुलीची हत्या केल्याची भयंकर घटना समोर आली आहे. एका महिलेने आपल्या ३ वर्षांच्या मुलीला आधी अंगाई गीत गात झोपवलं. त्यानंतर झोपलेल्या मुलीला घेऊन ती फिरण्यासाठी तलावाच्या काठावर गेली. त्याठिकाणी तिने आपल्या मुलीला तलावामध्ये फेकून दिलं. मुलीची हत्या केल्यानंतर या महिलेने थेट पोलिस ठाण्यात धाव घेतली आणि आपली मुलगी बेपत्ता असल्याची तक्रार दाखल केली. अखेर पोलिस तपासादरम्यान महिलेचा खरा चेहरा समोर आला.

मिळालेल्या माहितीनुसार, महिला आपल्या नवऱ्याला सोडल्यानंतर राजस्थानच्या अजमेरमध्ये एका व्यक्तीसोबत राहत होती. या महिलेला पहिल्या नवऱ्यापासून मुलगी होती. या मुलीला सोबत घेऊन ती या व्यक्तीसोबत राहत होती. त्यामुळे ही व्यक्ती या महिलेला सतत टोमणे मारायचा. याच त्रासाला महिला कंटाळली होती.

मंगळवारी रात्री उशिरा गस्तीवर असताना एका पोलिसाला ही महिला दिसली. त्यांनी तिला तुम्ही ऐवढ्या रात्री इथे काय करता असे विचारले. तेव्हा या महिलेने सांगितले होते की, तिची ३ वर्षांची मुलगी घराबाहेर पडली होती पण ती अचानक गायब झाली. मी रात्रभर तिचा शोध घेतला पण ती काही सापडली नाही.

या प्रकरणाचा तपास करत असताना धक्कादायक माहिती समोर आली. पोलिसांनी सीसीटीव्ही फुटेज तपासले असता ही महिला मुलीला हातामध्ये घेऊन शहरातील आना सागर तलावा किनारी फिरण्यासाठी गेली होती. काही तासानंतर मध्यरात्री दीड वाजता ही महिला एकटीच फोनवर बोलण्यात व्यस्त असल्याचे सीसीटीव्हीत दिसले. तिच्या हालचाली संशयास्पद होत्या. बुधवारी सकाळी पोलिसांना चिमुकलीचा मृतदेह तलावात दिसला. त्यानंतर पोलिसांनी महिलेची कसून चौकशी केली असता तिने मुलीची हत्या केल्याचा गुन्हा कबूल केला.

या गुन्ह्यात एकट्या महिलेचाच सहभाग होता. तिचा लिव्ह इन पार्टनर अखिलेशला पहाटे मुलगी बेपत्ता असल्याचे कळाले. अखिलेश महिलेला तिच्या मुलीवरून सतत टोमणे मारत होता. यामुळे महिला प्रचंड वैतागली होती. त्यामुळे तिने हे धक्कादायक कृत्य केले. आरोपी महिला वाराणसीची आहे. नवऱ्यापासून विभक्त झाल्यानंतर ती प्रियकरासोबत अजमेरमध्ये लिव्ह इनमध्ये राहत होती. ती एका हॉटेलमध्ये रिसेप्शनिस्ट म्हणून काम करत होती. अखिलेश देखील तिथेच काम करत करतो.