Raigad Crime News: तीन तरुणांमध्ये वाद अन् एकाची निर्घृण हत्या, भयंकर घटनेने रायगड हादरलं; हल्लेखोर फरार

सचिन कदम, ता. १३ सप्टेंबर

Raigad Crime: तीन तरुणांमधील वाद आणि त्यानंतर झालेल्या मारहाणीत एकाचा मृत्यू झाल्याची धक्कादायक घटना रायगडमध्ये घडली. माणगाव रेल्वे स्थानकानजिक घडलेल्या या घटनेने सर्वत्र खळबळ उडाली असून याप्रकरणी दोन अनोळखी आरोपींविरोधात माणगाव पोलिस ठाण्यात गुन्हा दाखल करण्यात आला आहे. पोलीस अधिक तपास करत आहेत.

याबाबत सविस्तर माहिती अशी की, तीन व्यक्तींमधील भांडण आणि मारामारीनंतर एकाचा मृत्यू झाल्याची घटना माणगाव रेल्वे स्थानकानजिक दुकानाच्या शेडमध्ये घडली. या परिसरात गुरुवारी सकाळी अंगावर हत्याराच्या जखमा असलेला मृतदेह आढळून आला होता. त्यानंतर पोलिसांनी तपास करत असताना दुकानातील सीसीटीव्ही कॅमेऱ्याची तपासणी केली. यामध्ये भांडण आणि मारामारीची घटना कैद झाली होती. ज्यावरुन या प्रकरणाचा खुलासा झाला.

बुधवारी (ता. ११ सप्टेंबर) रात्री 9 वाजण्याच्या सुमारास माणगाव रेल्वे स्थानकानजिक दुकानाच्या शेडमध्ये तीन तरुणांमध्ये वाद झाला त्यानंतर ही मारामारीची घटना घडली. या मारहाणीत एक तरुण गंभीर जखमी झाला होता. धक्कादायक म्हणजे गंभीर जखमी व्यक्तीला उपचार देण्याएवजी तशाच जखमी अवस्थेत सोडून दोन्ही आरोपी फरार झाले.

वेळेत उपचार न मिळाल्यानेच या तरुणाचा मृत्यू झाल्याचे पोलीस तपासात समोर आले आहे. दरम्यान, गुन्ह्यात वापरलेले चाकूसारखे हत्यार, रक्त पुसून पुरावे नष्ट केल्याप्रकरणी दोन अनोळखी व्यक्तींविरोधात हा गुन्हा दाखल करण्यात आला आहे. पोलीस या प्रकरणाचा अधिक तपास करत आहेत. दरम्यान, काही दिवसांपूर्वीच रायगड जिल्ह्यात तिहेरी हत्याकांडाची घटना घडली होती. त्यानंतर आता आणखी एक हत्येची घटना समोर आल्याने परिसरात एकच खळबळ उडाली आहे.