Pune News : वाघोली अपघात प्रकरणी पोलिसांची मोठी कारवाई, डंपरच्या मालकाला ठोकल्या बेड्या

दोन दिवसांपूर्वी वाघोली येथे झालेल्या अपघातप्रकरणी पोलिसांनी डंपर मालकाला अटक केली आहे. या अपघातात तीन जणांचा मृत्यू झाला होता. दारूच्या नशेत डंपर चालकाने फुटपाथवर झोपलेल्या ९ जणांना चिरडले होते. त्याच्यावर गुन्हा दाखल करत अटक करण्यात आली होती. आता डंपर मालकालाही पोलिसांनी बेड्या ठोकल्या आहेत. निष्काळजीपणा केल्याचा आरोप ठेवत पोलिसांनी ही कारवाई केली आहे.

वाघोली अपघात प्रकरणी डंपर मालकाला अटक करण्यात आली. पुणे नगर रस्त्यावरील डंपरने कामगारांना चिरडल्याप्रकरणात पोलिसांनी डंपर मालकाला अटक केली आहे. निष्काळजीपणा केल्याचा आरोप ठेवत पोलिसांनी ही कारवाई केली आहे. अनिल काटे असे अटक करण्यात आलेल्या डंपर मालकाचे नाव असून लोणीकंद पोलिसांत गुन्हा दाखल करण्यात आलाय.

पुण्यातील वाघोली चौकात भरधाव डंपर चालकाने नशेत फुटपाथवर झोपलेल्या ९ मजुरांना चिरडले होते, यात तिघांचा जागीच मृत्यू झाला होता. डंपर मालकाला चालकाचे दारू पिण्याचे व्यसन होते. जेव्हा डंपर चालक डंपर घेऊन चालला होता तेव्हा काटे याला याबाबत माहिती होती, असे तपासात समोर आले आहे. तपासात काटे याने चालकाने डंपर घेऊन जाताना दारू पिली होती का नव्हती? याबद्दल माहिती नसल्याचेही सांगितले.

पुण्यातील वाघोली अपघात प्रकरणी मोठी अपडेट समोर

पुण्यातील वाघोली अपघातप्रकरणी मोठी अपडेट समोर आली आहे. मजुरांना चिरडण्यापूर्वी चालकाने एका दुकानावर डंपर घातला होता. वाघोलीतील बायफ रोडवरील ग्राहक सेवा केंद्राच्या दुकानावर डंपर घातला होता. यामध्ये त्या केंद्र चालकाचे संगणक, प्रिंटर व झेरॉक्स मशीनचे व भिंतीचे नुकसान झाले. तेथे धडक देवून व तेथे एका चहा विक्रेत्याशी वाद घालून तो पुढे आला अन् केसनंद फाट्यावर मजुरांना चिरडले. त्या डंपरचा एक आरसा या शटर जवळ आढळून आला आहे.

योगेश मोटकर असे या सेवा केंद्र मालकाचे नाव आहे. सकाळी दुकान उघडण्यासाठी गेल्यावर त्याला हा अपघात झाल्याचे समजल्यानंतर त्याने अपघातस्थळी जात डंपरची पाहणी केली. यात त्याच्या शटर व भिंतीचा रंग डंपरला लागल्याचे त्यांच्या निदर्शनास आले आणि त्यांनतर त्यांनी पोलिसांना ही माहिती दिली.