Crime News : दुप्पट परताव्याच्या आमिषाला भुलली तरुणाई, सायबर चोरट्यांनी घातला कोट्यावधींचा गंडा; काय आहे नेमकं प्रकरण ?

अक्षय बडवे, पुणे

पुण्यासारख्या उच्चशिक्षित शहरात धक्कदायक प्रकार घडला आहे. तरुणांना शेअर बाजार, बिटकॉईनमध्ये गुंतवणुकीचे आमिष दाखवून त्यांना साडेचार कोटींचा गंडा घालण्यात आला आहे. पुण्यातील हडपसर, मांजरी आणि कोंढवा भागातून हा प्रकार उघडकीस आला आहे. धक्कदायक म्हणजे या फसवणूक झालेल्या तरुण मंडळींमध्ये एका व्यावसायिकाचा देखील समावेश आहे. याप्रकरणी पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, १५ जुलै ते सात ऑक्टोबर दरम्यान हा फसवणुकीचा सगळा प्रकार घडला. पुण्यातील हडपसरमधील ५२ वर्षीय व्यावसायिकाशी तीन अनोळखी व्यक्तींनी मोबाईल व इ-मेलद्वारे संपर्क साधला. ‘शेअर बाजारात गुंतवणूक केल्यास दुप्पट परतावा मिळेल,’ असे सांगत त्यांचा विश्वास संपादन केला. त्यानंतर विविध बॅंक खात्यांमध्ये रक्कम जमा करण्यास भाग पाडले. फिर्यादीने तब्बल तीन कोटी ६६ लाख ४४ हजार रुपये सायबर चोरट्यांच्या खात्यात वर्ग केले. मात्र, कोणताही परतावा न मिळाल्याने फसवणुकीचे स्पष्ट झाल्यावर त्यांनी सायबर पोलिसांकडे धाव घेतली.

तसेच, हडपसरमधील मांजरी भागात राहणाऱ्या तरुणालाही अशाच प्रकारे सायबर चोरट्यांनी जाळ्यात ओढले. सुरुवातीला थोडाफार परतावा दिल्यानंतर त्याला सातत्याने अधिक पैसे गुंतविण्यास भाग पाडले. अखेरीस या तरुणाची ३४ लाख ५२ हजार रुपयांची फसवणूक झाली आहे.

याशिवाय, कोंढवा परिसरातील एका व्यक्तीला बिटकॉइन गुंतवणुकीचे आमिष दाखवून १२ लाख ९० हजार रुपयांचा गंडा घालण्यात आला. सायबर चोरट्यांनी तक्रारदाराशी संपर्क साधून ‘बिटकॉइनमध्ये गुंतवणूक करा, मोठा परतावा मिळेल,’ असे सांगून त्याच्या खात्यातून रक्कम वळवली. पैसे जमा केल्यानंतर चोरट्यांनी मोबाईल क्रमांक बंद केले. पुण्यातील हडपसर, मांजरी आणि कोंढवा भागात घडलेल्या सायबर फसवणुकीच्या या घटनेने शहरात भीतीचे वातावरण निर्माण झाले आहे. दरम्यान या फसवणुकी विरोधात गुन्हा दाखल करण्यात आला आहे. पोलीस या फसवणुकी विरोधात काय कारवाई करणार हे पाहणं महत्त्वाचं ठरेल.