Pune Crime: कार्यालयात शिरून राष्ट्रवादी काँग्रेसच्या पदाधिकाऱ्याला मारहाणीचा प्रयत्न, CCTV Video व्हायरल

अक्षय बडवे, साम प्रतिनिधी

कार्यालयात शिरुन राष्ट्रवादी काँग्रेसच्या पदाधिकाऱ्याला मारहाण करण्याचा प्रयत्न झाल्याची घटना पुण्यातील महर्षीनगरमध्ये घडलीय. ही घटना तेथील एका सीसीटीव्ही कॅमेऱ्यात कैद झाली आहे. दरम्यान या घटनेप्रकरणी तीन जणांविरोधात गुन्हा दाखल करण्यात आलाय. मिळालेल्या माहितीनुसार राष्ट्रवादीच्या या पदाधिकाऱ्याकडे पुणे शहर माहिती अधिकार सेलची जबाबदारी आहे. दिनेश पंडित खराडे असं या पदाधिकाऱ्याचे नाव आहे. त्यांनी याप्रकरणी स्वारगेट पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, हा सगळा प्रकार ५ नोव्हेंबर रोजी रात्री १० वाजता घडला. दिनेश खराडे बांधकाम व्यावसायिक आहेत. त्यांच्याकडे सध्या माहिती अधिकार सेलचे पुणे शहरची जबाबदारी आहे. महर्षीनगर परिसरात त्यांचे कार्यालय आहे. ५ नोव्हेंबर रोजी ते कार्यालयात असताना रात्री १० वाजण्याच्या सुमारास एक तरुण त्यांच्या कार्यालयात शिरला. त्याच्या हातामध्ये लाकडी बांबू होता. त्याने अचानक त्यांना मारहाण करण्याचा प्रयत्न केला.

दरम्यान मारहाणीनंतर तो दुचाकीवरून पळून गेला. खराडे यांच्या कार्यालयाबाहेर एका दुचाकीवर दोनजणं थांबले होते. कार्यालयात शिरलेला तरुण त्या दोघांसोबत तेथून पसार झाला. मारहाणीची प्रयत्न करणारा तरुण नेमका कोण होता? कशासाठी मारहाण करण्याचा प्रयत्न केला, याचं कारण समजू शकलेले नाहीये. दरम्यान या घटनेचे व्हिडिओ समोर आले आहेत. यात काही तरुण पळताना दिसत आहेत.एका तरुणाचा हातात लाकडी बांबू दिसत आहे.

कोयता गँग, टोळी युद्धानं बेजार झालेल्या पुण्यातील गुंडगिरी कमी होताना दिसत नााहीये. गावगुंडांना आणि कोयता गँगच्या सदस्यांना वटणीवर आणण्यासाठी पुणे पोलीस अनेक उपाय योजना करत आहे. जेथे दहशत माजवण्याचा प्रयत्न केला तेथेच गावगुंडाची धिंड देखील पुणे पोलिसांकडून काढण्यात आल्या तरी शहरातील गुंडगिरी कमी होताना दिसत नाहीये.