Pune Crime News: 'मी IAS अधिकारी, नादाला लागू नको', धमकी देत पैसे उकळले, पुण्यातील तरुणीचा प्रताप, अवैध सावकारीचा गुन्हा दाखल

नितीन पाटणकर, पुणे|ता. २७ जुलै २०२४

वादग्रस्त ट्रेनी आयएएस अधिकारी पूजा खेडकर प्रकरण राज्यातच नव्हेतर देशभरात गाजत आहे. पूजा खेडकर यांच्यासह त्यांची आई मनोरमा खेडकर यांचे नवनवीन कारनामे समोर येत आहेत. अशातच आता पुण्यामध्ये आणखी एक बनावट अधिकारी धुमाकूळ घालत असल्याचा धक्कादायक प्रकार समोर आला आहे.

याबाबत सविस्तर माहिती अशी की, आएएस अधिकारी पूजा खेडकर यांचे प्रकरण चर्चेत असतानाच पुण्यामध्ये आणखीन एक बनावट आयएएस अधिकारी धुमाकूळ घालत असून धमकी देत पैसे उकळत असल्याचा प्रकार समोर आला आहे. ⁠रेणुका ईश्वर करनुरे असे या तोतया आयएएस अधिकाऱ्याचे नाव आहे.

पुण्यातील वडकी परिसरात राहणाऱ्या रेणुका ईश्वर करनुरे ही परिसरातील अनेक महिलांना व्याजाने पैसे देत असून दरमहा दहा रुपये टक्क्याने ते उकळत असल्याची माहिती उघडकीस आली आहे. ⁠या प्रकरणी रेणुका विरोधात एका 31 वर्षीय महिलेने लोणी काळभोर पोलिसात अवैध सावकारकीचा गुन्हा दाखल केला आहे.

⁠31 वर्षीय पीडित महिलेच्या तक्रारीनुसार, तिला तोतया आयएएस अधिकारी रेणुका हिने दोन लाख 68 हजार रुपये व्याजाने दिले होते. या बदल्यात पीडितेने रेणुकाला आतापर्यंत तीन लाख 48 हजार रुपये परत दिले. तरीही रेणुका हिने आणखी चार लाख 55 हजार रुपयांची मागणी करत पिढीतील त्रास देत धमकवण्यास सुरुवात केली.

मी आयएएस अधिकारी आहे माझ्या नादीला लागू नको, तुला कामाला लावेल. माझे पैसे तू ताबडतोब दे अशा धमक्या तिने पीडितेला दिल्या. ⁠या सगळ्या त्रासानंतर पीडित महिलेने लोणी काळभोर पोलिसात गुन्हा दाखल केला आहे. या प्रकरणी आता बनावट आयएस अधिकारी रेणुका ईश्वर करनुरे यांच्यावर गुन्हा दाखल करण्यात आहे.