नाशिक एसीबीचा दणका; ५०० रुपये घेताना भूमिअभिलेख उपअधीक्षकाला पकडलं

वारसाहक्काने मिळालेल्या घराची नोंद नावावर करण्यासाठी भूमिअभिलेख उपअधीक्षकाने लाच मागितल्याची घटना उघडकीस आली आहे. बागलाण येथील भूमिअभिलेख कार्यालयात नाशिक लाचलुचपत प्रतिबंधक विभागाच्या पथकाने सापळा रचत लाचखोर अधिकाऱ्याला अटक केलीय. एसीबीच्या कारवाईमुळे महसुल विभागात खळबळ उडालीय.

याप्रकरणी सटाणा पोलीस ठाण्यात लाचलुचपत प्रतिबंधक कायद्यान्वये भुमीअभिलेख उपअधिक्षक देवेंद्र मधुकर भावसार यांच्या विरोधात गुन्हा दाखल करण्यात आलाय. त्यानंतर त्यांना अटक करण्यात आली. वारसाहक्काने मिळालेल्या घराची नोंद नावावर करून देण्यासाठी उपअधिक्षकांनी ५०० रुपयांची लाच मागितली होती.

या प्रकरणातील तक्रारदाराच्या मयत वडिलांचे सटाणा शहरात घर आहे. हे वडिलोपार्जित घर वारसाहक्काने स्वतःच्या नावावर नोंदवून घेण्यासाठी तक्रारदाराने भूमिअभिलेख कार्यालयाशी संपर्क साधला होता. संबंधित काम करून देण्यासाठी उपअधीक्षक देवेंद्र भावसार यांनी ५०० रुपयांच्या लाचेची मागणी केली. या संदर्भात सदर तक्रादार व्यापार्‍याने २८ ऑक्टोंबर रोजी नाशिक लाचलुचपत प्रतिबंधक विभागाकडे तक्रार केली. भुमीअभिलेख उपअधिक्षक लाचेची मागणी करीत असल्याचं त्यांनी आपल्या तक्रारीत म्हटलं होतं.

या तक्रारीनुसार पंचांसमक्ष लाचेच्या मागणीची पडताळणी करण्यात आली असता उपअधिक्षक भावसार यांनी वडिलोपार्जित घरावर वारसा हक्काने तक्रारदार यांचे नाव लावण्यासाठी तक्रारदाराकडे ५०० रूपये लाचेची मागणी पंचासमक्ष केल्याचे निष्पन्न झाले होते. या पार्श्वभूमीवर सोमवारी उपअधिक्षक भुमिलेख कार्यालयात लाचलुचपत विभागाच्या पथकाने सापळा लावून भावसार यांनी पंचासमक्ष तक्रादरार यांच्याकडून लाचेची रक्कम स्विकारताच त्यांना ताब्यात घेण्यात आले.

नाशिक लाचलुचपत प्रतिबंधक विभागाचे पोलीस निरीक्षक विकास लोंढे, हवा. प्रभाकर गवळी, किरण धुळे यांच्या पथकातर्फे ही कारवाई करण्यात आली. या संदर्भात सटाणा पोलीस ठाण्यात गुन्हा दाखल करण्यात आला आहे.