Kolhapur Breaking News: खळबळजनक! आंबा घाटात आढळले २ तरुणांचे मृतदेह; अपघात की घातपात? पोलिसांकडून तपास सुरु

रणजित माजगावकर, ता. १८ ऑगस्ट २०२४

कोल्हापूरमधून एक धक्कादायक घटना समोर आली आहे. कोल्हापूर जिल्ह्यातील आंबा घाटात दोन तरुणांचे मृतदेह आढळून आल्याने एकच खळबळ उडाली आहे. सध्या मृतदेह बाहेर काढण्याचे काम सुरू असून या दोघांचा मृत्यू कशामुळे झाला? हा अपघात, घातपात की आत्महत्या? याबाबतचा तपास करण्याचे आव्हान पोलिसांसमोर आहे.

याबाबत सविस्तर माहिती अशी की, कोल्हापूर जिल्ह्यातील आंबा घाटामध्ये दोन तरुणांचे मृतदेह आढळून आल्याने एकच खळबळ उडाली आहे. याबाबतची माहिती मिळताच देवरुख व शाहूवाडी पोलीस स्टेशनच्या अधिकारी तसेच कर्मचाऱ्यांनी घटनास्थळी धाव घेतली आहे. सध्या मृतदेह दरीतून बाहेर काढण्याचे काम सुरू आहे.

मृत तरुणांपैकी एक जण सांगलीमधील तर दुसरा निपाणीचा रहिवासी असल्याची प्राथमिक माहिती सध्या समोर आली आहे. दोन्ही तरुणांचे मृतदेह बाहेर काढण्याची मोहीम सुरू असून मुसळधार पाऊस, दाट धुके तसेच दरी खोल असल्याने मृतदेह बाहेर काढण्यास अडथळा निर्माण होत आहे.

दरम्यान, या तरुणांचा मृत्यू नेमका कशामुळे झाला? यामध्ये काही घातपाताचा कट आहे का? असे अनेक सवाल आता उपस्थित आहेत. मृतदेह बाहेर काढल्यानंतर याबाबत पोलीस तपास सुरू होणार असून त्यामध्ये सर्व प्रकार समोर येईल.