![CCTV Footage](http://media.assettype.com/saamtv%2F2024-03%2Fa80d8e6d-3d05-4e74-b223-1452d84e6865%2FKalyan_Crime_News__4_.jpg?w=480&auto=format%2Ccompress&fit=max)
अभिजित देशमुख
आपल्या आयुष्यात येणाऱ्या विविध संकटांना समोरे जाताना प्रत्येक व्यक्ती देवाचे नामस्मरन करतो. मोठी घटना घडल्यास देव त्यांना त्यांची शिक्षा देईल असं अपसुकच आपल्या तोंडून निघतं. मात्र कल्याणमध्ये चोरट्यांना देवाची देखील भीती उरलेली नाही, अशीच एक घटना समोर आली आहे. चोरट्यांनी मंदिरातून चोरी केली आहे.
कल्याण पूर्वेकडील कचोरे येथील गावदेवी मंदिरात पुन्हा एकदा चोरीचा प्रकार घडला आहे. दोन अज्ञात चोरट्यांनी काल दुपारी मंदिरात जाऊन देवीच्या चांदीतील पादुका चोरून नेल्या आहेत. हा सर्व प्रकार मंदिरातील सीसीटीव्ही कॅमेऱ्यात कैद झाला आहे.
शुक्रवारी दुपारी दुपारी कचोरे गावदेवी मंदिरात दर्शन घेण्याच्या बहाण्याने आधी एक चोरटा आत शिरला. त्याने देवीची पूजा करत तिला नमस्कार केला. त्यानंतर काही मिनिटांनी बाहेर उभा असणारा त्याचा दुसरा साथीदारही आतमध्ये आला. त्यानेही देवीची पूजा अर्चना केली, नमस्कार केला. मग हळूच इकडे तिकडे बघत देवीच्या मूर्तीसमोर ठेवण्यात आलेल्या चांदीच्या पादुका उचलून दोघांनीही तिकडून धुम ठोकली.
या चांदीच्या पादुकांची किंमत अंदाजे 30 हजार रुपये इतकी आहे. संध्याकाळच्या सुमारास स्थानिक ग्रामस्थ देवीच्या पूजेसाठी गेले असता त्यांना देवीसमोर चांदीच्या पादुका नसल्याचे आढळले. सीसीटीव्ही फूटेज तपासल्यानंतर हा सर्व प्रकार उघड झाला. दरम्यान या प्रकरणी टिळक नगर पोलीस ठाण्यात गुन्हा दाखल करण्यात आला असून पोलीस चोरट्यांचा शोध घेत आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.