Mumbai crime : गुजरातच्या व्यक्तीचा मुंबईत मृत्यू, अल्पवयीन मुलीसोबत शारीरिक संबंध ठेवताना आला हार्ट अटॅक

मुंबईतून एक धक्कादायक बाब समोर आली आहे. मुंबईच्या ग्रँट रोडमधून एक मोठी आणि हैराण करणारी घटना घडली. महाराष्ट्रातील मुंबईतील ग्रँट रोडमधील एका हॉटेलमध्ये अल्पवयीन मुलीसोबत शारीरिक संबंध ठेवल्यानंतर एका ४१ वर्षीय व्यक्तीचा अचानक मृत्यू झाला. सोमवारी पोलीस अधिकाऱ्याने ही माहिती दिल्याने परिसरात एकच खळबळ उडाली.

अधिकाऱ्यांनी काय दिली माहिती?

अधिकाऱ्याच्या म्हणण्यानुसार, हा व्यक्ती एका डायमंड कंपनीचा मॅनेजर होता. या मृत व्यक्तीवर १४ वर्षीय मुलीच्या आईच्या तक्रारीवरून भारतीय न्याय संहिता आणि मुलांचे लैंगिक गुन्ह्यांपासून संरक्षण (पोक्सो) कायद्यांतर्गत बलात्कार आणि इतर गुन्ह्यांसाठी गुन्हा दाखल करण्यात आला होता.

ही घटना शनिवारी घडली. तो मुलीला गुजरातमधून सोबत घेऊन आला होता. त्याची प्रकृती खालावल्याने हॉटेलच्या कर्मचाऱ्यांनी त्याला रुग्णालयात नेलं. यानंतर काही वेळाने त्याचा मृत्यू झाला. त्याला हृदयविकाराचा झटका आल्याची प्राथमिक माहिती असल्याचं, अधिकाऱ्यांनी सांगितलं.

डीबी मार्ग पोलीस स्टेशनमधून मिळालेल्या माहितीनुसार, माहिती मिळाल्यानंतर मुलीची आई मुंबईत आली, तिने आम्हाला सांगितलं की, त्या व्यक्तीने मुलीला खोटं आश्वासन देऊन मुंबईला आणलं. दरम्यान या प्रकरणाचा तपास अजून सुरु आहे.

मूळचा गुजरातचे असलेला तरुण आणि १४ वर्षांची मुलगी एकमेकांना ओळखत होते. मुलीच्या वडिलांना अर्धांगवायूचा झटका आल्यापासून हा व्यक्ती मुलीच्या कुटुंबाला आर्थिक मदत करत होता. मुंबई फिरवतो असं सांगून त्याने मुलीला स्वतःसोबत आणलं होतं. तिच्या नावे बनवलेल्या बनावट आधार कार्डद्वारे तो मुंबईतील एका लॉजमध्ये थांबला होता.

यावेळी अल्पवयीन मुलीवर शारीरीक अत्याचार करताना तो अचानक बेशुद्ध पडला. त्यानंतर लॉज कर्मचाऱ्यांनी याबाबतची माहिती पोलिसांना दिली. पण रुग्णालयात उपचारापूर्वीच त्याचा मृत्यू झाल्याचं समोर आलं.