Crime: माझ्या जागेत बाथरून का बांधले? जाब विचारल्यामुळे काका संतापला; पुतण्याला जागीच संपवलं, बारामती हादरले

बारामतीमध्ये काकाने पुतण्याची निर्घृण हत्या केल्याची धक्कादायक घटना समोर आली आहे. माझ्या जागेत बाथरूम का बांधले? असा जाब विचारल्यामुळे संतप्त झालेल्या काकाने पुण्याला बेदम मारहाण केली. बारामती तालुक्यातील पारवडीमध्ये बुधवारी रात्री साडेदहा वाजताच्या सुमारास ही घटना घडली. बाथरूम बांधल्याच्या वादातून काका आणि त्याच्या मुलाने पुतण्याला मारहाण केली. या मारहाणीत तरुणाचा जीव गेला. या प्रकरणी बारामती तालुका पोलिसांनी दोघांना अटक केली.

मिळालेल्या माहितीनुसार, ही घटना बारामती तालुक्यातील पारवडी येथील इंगळे वस्तीवर बुधवारी रात्री १० वाजताच्या सुमारास घडली. या घटनेमध्ये सौरभ विष्णू इंगळे (२४ वर्षे) या तरुणाचा मृत्यू झाला. या प्रकरणात तालुका पोलिसांनी प्रमोद रामचंद्र इंगळे आणि रामचंद्र जगन्नाथ इंगळे या दोघांना रात्री उशिरा अटक केली. महत्वाचे म्हणजे सौरभला मारहाण केल्यानंतर प्रमोद इंगळे आणि रामचंद्र इंगळे या दोघांनी तालुका पोलिस ठाण्यात येऊन सौरभविरोधात फिर्याद देऊन दिली होती. मात्र यादरम्यान मारहाणीत गंभीर जखमी झालेल्या सौरभला बारामतीतील खासगी रुग्णालयात उपचारासाठी नेण्यात आले होते.

पोलिसांनी सांगितले की, बाथरूम माझ्या जागेत बांधले असा सौरभचा दावा होता. यावरून इंगळे वस्तीवर सौरभ इंगळेने प्रमोद आणि रामचंद्र इंगळे यांना जाब विचारला. याचे पर्यावसन भांडणात झाले. या भांडणात प्रमोद इंगळे आणि रामचंद्र इंगळे या दोघांनी सौरभला बेदम मारहाण केली. सौरभच्या चुलत भावांनी सौरभला बारामती दवाखान्यात आणले. या दरम्यान आपल्याला मारहाण होत असल्याची माहिती देखील सौरभने पोलिसांना दिली होती.

बारामतीतील दवाखान्यात आणल्यानंतर त्याची प्रकृती आणखी बिघडली आणि त्याचा मृत्यू झाला. तोपर्यंत प्रमोद इंगळे आणि रामचंद्र इंगळे हे दोघे जण बारामती तालुका पोलिस ठाण्यात आले होते आणि त्यांनी सौरभविरोधात फिर्याद दिली. मात्र या दरम्यानच्या काळात सौरभचा मृत्यू झाल्याने पोलिसांनी प्रमोद इंगळे आणि रामचंद्र इंगळे या बापलेकाविरोधात गु्न्हा दाखल करत त्यांना अटक केली.