Dombivli : डोंबिवलीत जबरी घरफोडी! बंद घरावर चोरट्यांची नजर, सेफ्टी डोअर तोडून ४० तोळे सोने लंपास

संघर्ष गांगुर्डे, डोंबिवली

डोंबिवलीतून धक्कादायक प्रकार समोर आला आहे. लग्नसमारंभासाठी बाहेरगावी गेलेल्या एका कुटुंबियांच्या घरी जबरी घरफोडी झाली आहे. या घरफोडीत संबंधित कुटुंबियांच्या घरातून ४० तोळे सोने आणि ५० हजारांची रोकड लंपास करण्यात आली आहे. सदर घटना डोंबिवलीतील देसले पाडा येथील आर.पी. रेसीडेन्सीमध्ये घडली आहे. याप्रकरणी पोलिसांत तक्रार दाखल करण्यात आली आहे.

मिळालेल्या माहितीनुसार, डोंबिवली पूर्वेतील देसलेपाडा परिसरातील आर.पी. रेसीडेन्सी येथे राहणारे अशिष रामधनी यादव हे आपल्या कुटुंबासह मूळ गावी उत्तर प्रदेश येथे लग्नसमारंभासाठी गेले होते. जाताना त्यांनी घराची चावी तिची बहीण जी डोंबिवली सोनारपाडा परिसरात राहत असणाऱ्या मायादेवी यांच्याकडे सुरक्षिततेसाठी दिली होती. दरम्यान 9 फेब्रुवारी रोजी घरात पेस्ट कंट्रोलचे काम करण्यात आले होते. त्यानंतर घर व्यवस्थित लॉक करून बंद करण्यात आले होते.

तसेच 15 फेब्रुवारी रोजी वॉटर फिल्टर दुरुस्तीसाठी तंत्रज्ञ येणार असल्याने मायादेवी व त्यांचे पती दुपारी सुमारे 1 वाजता घरात गेले असता धक्कादायक प्रकार उघडकीस आला.घराचे सेफ्टी डोअर व मुख्य दरवाजाची कडी तुटलेली होती. आत प्रवेश करून पाहणी केली असता दोन्ही बेडरूममधील कपाटे उघडी व लॉकर तोडलेले आढळले. घरातील साहित्य अस्ताव्यस्त फेकून दिले होते.घटनेची माहिती तात्काळ अशिष यादव यांना देण्यात आली.

प्राथमिक चौकशीत घरातील सुमारे 50 हजार रुपयांची रोकड तसेच अंदाजे 40 तोळे सोन्याचे दागिने चोरीस गेल्याचे समोर आले आहे. या प्रकरणी डोंबिवलीच्या मानपाडा पोलीस ठाण्यात अज्ञात चोरट्यांविरोधात घरफोडीचा गुन्हा दाखल करण्यात आला आहे. परिसरातील सीसीटीव्ही फुटेज तपासले जात असून पोलिसांनी संभाव्य संशयितांचा शोध सुरू केला आहे.

मात्र अलीकडील काळात डोंबिवलीत घरफोडीच्या घटनांमध्ये वाढ झाल्याने नागरिकांमध्ये भीतीचे वातावरण आहे. सुट्टी किंवा लग्नसराईच्या काळात गावी जाणाऱ्या कुटुंबांच्या घरांवर चोरट्यांचा डोळा असल्याची शक्यता व्यक्त केली जात आहे. नागरिकांनी घर बंद ठेवताना अतिरिक्त सुरक्षा उपाययोजना कराव्यात असे आवाहन पोलिसांकडून करण्यात आले आहे.