Dhule News : क्रुरतेचा कळस! जन्मदात्या बापानेच ३ वर्षांच्या चिमुकलीच्या डोक्यात घातलं दांडकं, मृतदेह घरामागे पुरला, पण समजलं कसं?

भूषण अहिरे

जन्मदात्या बापानेच डोक्यात दांडके घालून तीन वर्षांच्या मुलीचा खून करून तिला घरामागील जागेत खड्ड्यात पुरल्याची धक्कादायक घटना धुळे जिल्ह्यातील शिरपूर तालुक्यातील नांदर्डे येथे उघडकीस आली आहे. खुनी बापाला पोलिसांनी ताब्यात घेतलं असून पुरलेल्या मुलीचा मृतदेह देखील पोलिसांनी बाहेर काढून शवविच्छेदनासाठी पाठवण्यात आला आहे.

खुनी बापाच्या विरोधात शिरपूर पोलीस ठाण्यात गुन्हा दाखल करण्यात आला आहे. पुढील कायदेशीर कारवाई शिरपूर पोलीस करीत असून या घटनेमुळे परिसरात एकच खळबळ उडाली आहे.

खुनाची घटना ६ जूनला शिरपूर तालुक्यातील नांदर्डे गावात घडली होती, पूजा अनिल पावरा (वय ३) असे मृत मुलीचे नाव आहे. अनिल गुलाब पावरा याच्या पहिल्या पत्नीपासून झालेली मुलगी असून तिच्या आईचा घटस्फोट झाला आहे. तिला अनिल पावरा सांभाळत होता दरम्यान अनिल पवार याने दुसरं लग्न केलं, मात्र त्याची दुसरी बायकोही त्याला सोडून निघून गेली. त्यामुळे त्याला नैराश्य आलं होतं.

दरम्यांन ६ जूनला रात्री दारूच्या नशेत असलेल्या अनिल पावरा याने मुलीच्या डोक्यात लाकडी दांडके मारून तिचा खून केला. ६ जूनला सकाळी तिचा मृतदेह स्वतःच्या राहत्या घरामागे जमिनीत खड्ड्यात पुरला. दरम्यान शेजारी राहणाऱ्या नातेवाईकांना पूजा दिसत नसल्यामुळे हे बिंग फुटलं. खुनी बापानेच स्वतः या सर्व कृत्याची कबुली पोलिसांना दिली आहे.