Dharashiv News : धाराशिव हादरलं! पुलाखाली पाण्यात आढळले ३ मृतदेह; अपघात की घातपात?

Dharashiv News : धाराशिवमधून एक धक्कादायक प्रकार उघडकीस आला आहे. धाराशिवच्या तुळजापूर तालुक्यातील एका गावात पुलाखाली तीन मृतदेह आढळले आहेत. पोलिसांनी पाण्यातून मृतदेह बाहेर काढून तपासाला सुरुवात केली आहे. या घटनेमुळे परिसरात मोठी खळबळ उडाली आहे.

मिळालेल्या माहितीनुसार, धाराशिवमधील बाभळगावतील पुलाखाली तीन मृतदेह आढळले आहेत. यातील दोन मृतदेह हे महिलांचे, तर एक मृतदेह पुरुषाचा आहे. हे तीनही मृतदेह दोन दिवसांपूर्वी पाण्यात पडल्याचा अंदाज पोलिसांनी व्यक्त केला आहे. दरम्यान हा प्रकार अपघात की घातपात आहे याचा तपास स्थानिक पोलीस करत आहेत.

पाण्यातून मृतदेह काढल्यानंतर त्यांची ओळख पटवण्याचे काम सुरु झाले. यातील पुरुषाची ओळख पटली आहे. मृत व्यक्ती आनंदनगर मुरुम येथील पुरुष रहिवासी असल्याची माहिती समोर आली आहे. तर दोन्ही महिलांच्या मृतदेहाची ओळख पटण्याचे काम सुरु आहे. ही घटना बाभळगावजवळील सोलापूर-हैदराबाद महामार्ग क्रमांक ६५ वर घडली आहे.