Crime News : 5 विद्यार्थ्यांनी शिक्षिकेला मारण्याचा कट रचला, 9 वर्षीय मुलीचा गेला बळी; सीसीटीव्हीमुळे आले सत्य समोर

Crime : शिक्षिकेला धडा शिकवण्यासाठी ५ विद्यार्थांनी शाळेत स्फोट घडवून आणला. ही घटना छत्तीसगडच्या रायपूरमध्ये घडली आहे. शिक्षकेचा राग आल्याने तिला शाळेच्या बाथरुममध्ये स्फोटाने उडवण्याची योजना विद्यार्थांनी आखली होती. पण यात एका नऊ वर्षांच्या मुलीचा बळी गेल्याची माहिती पोलिसांनी दिली आहे. पोलिसांनी या प्रकरणी चौघांना ताब्यात घेतले आहे.

मिळालेल्या माहितीनुसार, हे ५ विद्यार्थी एका शिक्षिकेवर नाराज होते आणि तिला धडा शिकवण्याचा निर्णय घेतला. स्फोट कसा करायचा याची माहिती आरोपींनी मिळवली. सोडियम पाण्याच्या संपर्कात आल्याने त्याची स्फोटक प्रतिक्रिया होते याचा व्हिडीओ त्यांनी सोशल मीडियावर पाहिला. एका विद्यार्थिनीने तिच्या मावशीच्या नावाने सोडियम ऑनलाइन ऑर्डर केले. बाथरुममध्ये ते अशा प्रकारे लपवले की ज्याक्षणी कोणी फ्लश करेल तेव्हा तेथे स्फोट होईल.

त्याचदरम्यान एक नऊ वर्षांची मुलगी बाथरुममध्ये गेली. तिने फ्लश केले, त्याच क्षणी स्फोट झाला. स्फोटाचा आवाज आणि लहान मुलीच्या किंचाळ्या ऐकून शाळेतील कर्मचारी मदतीसाठी धावले. बाथरुमचा दरवाजा तोडल्यावर नऊ वर्षांची मुलगी बाथरुममध्ये खाली पडल्याचे त्यांना दिसले. तिचे संपूर्ण शरीर भाजले होते. जखमी अवस्थेत तिला रुग्णालयात दाखल करण्यात आले. या प्रकरणी मुलीच्या पालकांनी स्फोट करणाऱ्यांच्या विरोधात एफआयआर दाखल केली आहे.

एका नऊ वर्षाच्या मुलीला त्रास देण्याचा कोणी प्रयत्न केला याचा तपास पोलीस करत होते. या स्फोट प्रकरणामुळे ते हैराण झाले होते. शेवटी त्यांनी शाळेतील सीसीटीव्ही फुटेज चेक केले. फुटेजमध्ये काही विद्यार्थ्यांनी बाथरुममध्ये सोडियम लावल्याचे स्पष्ट दिसले. या कटामध्ये शाळेतील आठवी-नववी इयत्तेमधील दोन मुलं आणि तीन मुली सहभागी असल्याची माहिती पोलिसांनी दिली आहे. आरोपींना पोलिसांनी बालसुधारगृहात पाठवले आहे.