Crime News: लग्नाचे आमंत्रण दिले नाही, नाराज मित्रांनी नवरदेवाचं घर गाठलं; वडिलांना मारहाण करत गोळी झाडली

लग्नाचे आमंत्रण दिले नाही त्यामुळे संतापलेल्या तरुणाने आपल्या मित्राच्या वडिलांवर गोळी झाडली. ही घटना उत्तर प्रदेशच्या गाझियाबादमध्ये घडली. लग्नाची पत्रिका दिली नाही त्यामुळे नाराज झालेल्या मित्राने दारूच्या नशेत हे कृत्य केले आहे. लग्नाच्या आदल्या दिवशीच या तरुणाने मित्राच्या वडिलांवर गोळी झाडली. या गोळीबारात नरदेवाचे वडील गंभीर जखमी झालेत. या घटनेमुळे गाझियाबादमध्ये खळबळ उडाली आहे. लग्न घरामध्ये लगीनघाई सुरू असतानाच हा प्रकार घडल्यामुळे गोंधळ उडाला.

मिळालेल्या माहितीनुसार, गाझियाबादमध्ये लग्नाचे आमंत्रण न मिळाल्याने नाराज झालेल्या तरुणाने लग्नाच्या आदल्या दिवशीच आपल्या मित्राच्या वडिलांवर गोळीबार केला. दारूच्या नशेत या तरुणाने मित्राच्या वडिलांवर गोळ्या झाडल्या. ही घटना गाझियाबादमधील ट्रोनिका सिटी पोलिस ठाण्याच्या हद्दीत घडली. लग्नाचे आमंत्रण दिले नाही म्हणून या तरुणाने आधी मित्राच्या वडिलांना मारहाण केली. त्यानंतर त्यांच्यावर गोळी झाडली. या गोळीबारामध्ये नवरदेवाच्या वडिलांच्या हाताला गोळी लागली. सध्या त्यांच्यावर रुग्णालयात उपचार सुरू आहेत.

पोलिसांनी सांगितले की, गाझियाबादच्या ट्रोनिका सिटी पोलिस स्टेशन परिसरातील मंडोला पोलिस स्टेशन परिसरातील आसरा सोसायटीमध्ये राहणारा दीपांशूचे २२ तारखेला लग्न होणार आहे. त्यासाठी घरात हळदीची तयारी सुरू होती. दीपांशूने त्याचे मित्र वंश आणि तरुण यांना लग्नाला आमंत्रित केले नाही. दारू पिऊन वंश आणि तरुण दीपांशूच्या घराबाहेर पोहोचले आणि शिवीगाळ करू लागले. घरामध्ये असणारे सर्व पाहून हा तमाशा पाहत होते.

दीपांशूचे वडील सोनू यांनी वंश आणि तरुण यांना विरोध केला तेव्हा त्यांनी आधी त्यांना मारहाण केली आणि नंतर पिस्तूल काढून गोळी झाडली. गोळी दीपांशूच्या वडिलांच्या हाताला लागली. घटनास्थळी जमलेल्या लोकांनी दिपांशूच्या वडिलांना ताबडतोब उपचारासाठी रुग्णालयात दाखल केले. या घटनेनंतर तरुण आणि वंश घटनास्थळावरून पळून गेले. पोलिसांनी या संपूर्ण प्रकरणात गुन्हा दाखल केला असून दोन्ही आरोपींच्या शोधासाठी पथके तयार केली आहेत. या घटनेची सध्या सोशल मीडियावर जोरदार चर्चा होत आहे.