Crime News : जमिनीच्या वादातून KDMC कर्मचाऱ्यावर जीवघेणा हल्ला; कुख्यात गुंडाचा हात असल्याचा संशय, एकाला अटक

कल्याण मध्ये चिंचपाडा परिसरात जमिनीच्या वादातून एक व्यक्तीवर प्राणघातक हल्ला झाल्याची घटना समोर आली आहे. दिपक म्हात्रे असे हल्ला झालेल्या व्यक्तीचे नाव असून ते केडीएमसी कर्मचारी आहेत. या हल्ल्यामागे कुख्यात गुन्हेगाराचा हात असल्याचा संशय व्यक्त केला जात आहे. दरम्यान या प्रकरणी पोलिसांनी एकाला अटक केली असून बाकी गुन्हेगार फरार आहेत.

मिळालेल्या माहितीनुसार, कल्याण मध्ये चिंचपाडा परिसरात केडीएमसी कर्मचारी दिपक म्हात्रे यांच्यावर हल्ला करण्यात आला. सहा हल्लेखोरांनी कोयता आणि तलवारीने दिपक म्हात्रे यांच्यावर प्राणघातक हल्ला केला. हा हल्ला जमिनीच्या वादातून सुपारी देऊन घडवून आणल्याचा त्यांच्या कुटुंबीयांचा आरोप आहे. या प्रकरणात बदलापूरमधील गोळीबार प्रकरणात फरार असलेला कुख्यात गुन्हेगार अप्प्या दांडे थेट सामील असल्याचं समोर आलं आहे.

या घटनेचा संपूर्ण कट सीसीटीव्हीत कैद झालं असून याप्रकरणी कल्याण कोळसेवाडी पोलीस ठाण्यात सात आरोपी विरुद्ध गुन्हा दाखल करण्यात आला आहे. दरम्यान पोलिसांनी एका आरोपीला ताब्यात घेतलं आहे. मात्र अप्प्या दांडे आणि त्याचे साथीदार अजूनही फरार आहेत. तर हल्ल्यात जखमी असलेल्या दिपक म्हात्रे यांना खाजगी रुग्णालयात दाखल करण्यात आले आहे. या घटनेचा पुढील तपास पोलीस करत आहेत.

या घटनेने परिसरात भीतीचे वातावरण निर्माण झाले आहे. तसेच फरार आरोपींचा पोलीस शोध घेत आहेत. मात्र दिपक म्हात्रे यांच्यावर का हल्ला करण्यात आला? हे अद्यापही स्पष्ट झाले नसून त्यांच्या हल्लेखोरांना कोणती शिक्षा केली जाईल हे पाहणं महत्त्वाचं ठरेल.