Crime: हॉटेलमध्ये १५ वर्षीय मुलीवर सामूहिक बलात्कार; आठवी-दहावीतील ४ विद्यार्थ्यांचं भयंकर कृत्य

बिहारच्या पटनामध्ये १५ वर्षांच्या शाळकरी मुलीवर सामूहिक बलात्कार करण्यात आल्याची धक्कादायक घटना समोर आली आहे. चार शाळकरी मुलांनी हे धक्कादायक कृत्य केले. या प्रकरणी पीडित मुलीने पटनाच्या कोतवाली पोलिस ठाण्यात तक्रार दाखल केली होती. या घटनेचे गांभीर्य लक्षात घेऊन पोलिसांनी चारही आरोपींविरोधात गुन्हा दाखल केला. या चौघांना पोलिसांनी ताब्यात घेतलं आहे. चारही आरोपी अल्पवयीन असून ते आठवी आणि दहावीमध्ये शिकतात.

मिळालेल्या माहितीनुसार, पीडित मुलीची इन्स्टाग्रामवरून एका मुलासोबत ओळख झाली. त्यांची मैत्री इतकी वाढली की ते नेहमी इन्स्टावर बोलू लागले. मैत्रीचे रुपांतर प्रेमात झाले. त्यानंतर या मुलाने आपल्या इतर मित्रांसोबत या मुलीची ओळख करून दिली. १ महिन्यापूर्वी ही मुलगी दीपनगरमध्ये राहणाऱ्या बॉयफ्रेंडच्या घरी गेली होती. याठिकाणी दोघांनी शरीरसंबंध बनवले. त्यानंतर ते पुन्हा भेटले. मंगळवारी हा मुलगा या मुलीला घेऊन एका हॉटेलवर गेला. त्याठिकाणी त्याचे मित्र आधीच आले होते. या सर्वांनी या मुलीवर आळीपाळीने बलात्कार केला.

पीडित मुलीने हॉटेलमधून घर गाठले. तिने घरी गेल्यानंतर आपल्या कुटुंबीयांना याची माहिती दिली. हे ऐकून त्यांना मोठा धक्का बसला. त्यानंतर त्यांनी कोतवाली पोलिस ठाण्यात धाव घेत तक्रार दाखल केली. पोलिसांनी घटनेचे गांभीर्य लक्षात घेऊन चारही मुलांविरोधात गुन्हा दाखल केला. ही चारही मुलं देखील शिक्षण घेत आहेत. ते अल्पवयीन असून त्यांना पोलिसांनी ताब्यात घेतलं आहे. पोलिस या प्रकरणाचा तपास करत आहेत.