Crime news: पोटचा गोळा की काळ? आईला चौथ्या मजल्यावरून ढकललं; कारण ऐकून तुमचंही रक्त सळसळेल

बेंगळुरूमधून एक धक्कादायक आणि मन हेलावून टाकणारी घटना समोर आली आहे. एका मुलानेच आपल्या वृद्ध आणि आजारी आईला चौथ्या मजल्यावरून खाली ढकलून तिची हत्या केली आहे. या मुलावर आरोप झाल्यानंतर संपूर्ण परिसरात खळबळ माजली आहे.

कधी घडली ही घटना?

ही घटना बंगळूरच्या आरआर नगर परिसरातील बीईएमएल लेआउटमध्ये रविवारी दुपारच्या सुमारास घडली. 72 वर्षीय मृत महिला सवितराम्मा गेल्या चार ते पाच वर्षांपासून स्ट्रोकमुळे अंथरुणाला खिळल्या होत्या. त्यांच्या प्रकृतीमुळे त्या पूर्णपणे इतरांवर अवलंबून होत्या. दैनंदिन कामांसाठीही त्यांना इतरांची मदत लागत होती.

पोलिसांनी दिलेल्या माहितीनुसार, सवितराम्मा यांचा ४२ वर्षीय मुलगा वेंकटेश यानेच हे कृत्य केल्याचं समोर आलं आहे. प्राथमिक माहितीनुसार, त्याने त्याच्या आईला राहत्या इमारतीच्या चौथ्या मजल्यावरून खाली ढकलून दिलं. या घटनेत त्या गंभीर जखमी झाल्या आणि त्यांचा जागीच मृत्यू झाला.

आईच्या आजारपणामुळे मुलगा त्रस्त

तपासादरम्यान असंही समोर आलं आहे की, आईच्या आजारामुळे वेंकटेश मानसिकदृष्ट्या त्रस्त झाला होता. सततची जबाबदारी, ताण आणि परिस्थितीचा सामना करताना तो खचला असावा, अशी शक्यता पोलिसांकडून व्यक्त करण्यात येत आहे. पोलिसांच्या म्हणण्यानुसार, हा केवळ एक प्राथमिक अंदाज आहे. मात्र नेमकं कारण काय आहे हे संपूर्ण तपासानंतरच समोर येणार आहे.

मुलाला घेतलं ताब्यात

या घटनेनंतर आरआर नगर पोलीस ठाण्यात गुन्हा नोंदवण्यात आला असून पोलिसांनी तत्काळ तपास सुरू केला आहे. सध्या आरोपी वेंकटेशला ताब्यात घेऊन त्याची कसून चौकशी केली जात आहे. घटनेच्या वेळी नेमकं काय घडलं, कोणत्या परिस्थितीत हे पाऊल उचललं गेलं या सर्व गोष्टींची माहिती घेण्याचा प्रयत्न पोलिसांकडून सुरू आहे.

याशिवाय, या प्रकरणात आर्थिक अडचणी किंवा कौटुंबिक वाद यांचा काही संबंध आहे का, याचाही तपास पोलिसांकडून केला जात आहे. अधिकाऱ्यांनी सांगितलं की, आरोपीची मानसिक स्थिती समजून घेण्यासाठी त्याची वैद्यकीय तपासणीही करण्यात येणार आहे.

या घटनेमुळे स्थानिक नागरिकांमध्ये भीती आणि संतापाचं वातावरण निर्माण झालं आहे. आई-मुलाच्या नात्यातील इतकी टोकाची घटना समोर आल्याने अनेकजण हादरले आहेत. सध्या पोलिस सर्व बाजूंनी तपास करत असून, लवकरच या प्रकरणातील अधिक तपशील समोर येण्याची शक्यता आहे.