मुलाच्या अंत्यविधीपूर्वी धक्कादायक माहिती आली समाेर, कुटुंबियांना बसला माेठा धक्का;सूनेस अटक

- शुभम देशुमख

गोंदिया जिल्ह्यातील अर्जुनी मोरगाव नजकीच्या ईसापुर येथे पतीचा गळा आवळुन पत्नीने हत्या केल्याची घटना उघडकीस आली आहे. या प्रकरणी पोलिसांनी पत्नीवर (कलम 302) खूनाचा गुन्हा दाखल केला आहे. दरम्यान हत्येमागचं नेमक कारण काय ? याचा तपास मोरगांव अर्जूनी पोलिस करीत आहेत.

पाेलिसांनी दिलेल्या माहितीनूसार मेघशाम भावे व त्यांचे कुटुंबीय रात्री जेवण करुन झोपी गेले हाेेते. सकाळी मेघशाम उठले नाहीत. त्यामुळे त्यांच्या वडिलांनी ते का उठले नाहीत हे पाहण्यासाठी गेले. त्यांनी मेघशाम यांना उठविण्याचा प्रयत्न केला. काेणतीच हालचाल न झाल्याने त्यांनी मेघशामला स्पर्श केला. त्यावेळी त्यांचे शरीर थंड पडल्याचे लक्षात आले.

मेघशाम यांचे निधन झाल्याचे समजून कुटुंबियांनी नातेवाईकांना कळविले. बुधवारी (ता.12) दुपारी अंत्यविधी पूर्वी मेघशामला आंघोळीसाठी आणले असता त्याच्या गळ्यावरती गळफास सारखी काळ्या रंगाचे निशाण कुटुंबियांना दिसले.

हि बाब आई -वडिल आणि नातेवाईकांनी पाेलिसांना कळवली. अर्जुनी मोरगाव पोलिसांनी घटनास्थळी धाव घेत मेघशाम भावेंचे घर गाठले. तेथे पंचनामा करत मृतदेह शवविच्छेदन करण्यासाठी अर्जुनी मोरगाव ग्रामीण रुग्णालयात पाठविला. तसेच संशयावरुन पत्नी वैशालीला ताब्यात घेत तिची चौकशी केली. वैशालीने मेघशामचा गळा आवळुन हत्या केल्याची कबुली पाेलिसांना दिली.

Edited By : Siddharth Latkar