Accident News : समोरुन येणाऱ्या कारची बाईकला जोरदार धडक, काही अंतर फरफटलं; पाटील दाम्पत्याचा रस्त्यावरच करुण अंत

सचिन कदम, साम टीव्ही

रायगड : रायगड जिल्ह्यातील अलिबाग रेवस मार्गावर मानीफाटा येथे झालेल्या अपघातात दोघा पती-पत्नीचा जागीच मृत्यू झाला असल्याची धक्कादायक घटना समोर आली आहे. इनोव्हा कारने समोरून येणाऱ्या मोटारसायकलला धडक देत ५०० मीटर पर्यंत फरफटत नेले. विश्वास पाटील आणि कल्पना पाटील अशी मृतांची नावे असून ते अलिबाग तालुक्यातील नवेदर बेली येथील रहिवासी आहेत. अपघातानंतर परिसरातील नागरिक संतप्त झाले असून मोठा जमाव रस्त्यावर उतरला आहे. संतप्त जमावाने कारची तोडफोड केली असून अलिबाग रेवस रस्ता रोखून धरला आहे. त्यामुळे या मार्गावरील वाहतूक विस्कळीत झाली आहे. अलिबाग पोलीस घटनास्थळी पोहोचले असून ते जमावाला शांत करण्याचा प्रयत्न करत आहेत.

चिमुकलीला भरधाव कारने चिरडलं

दरम्यान, नागपूर शहरातून एक ह्रदयद्रावक घटना घडली आहे. घरासमोर खेळत असलेल्या चिमुकलीला एका भरधाव कारने चिरडलं आहे. अपघातानंतर कार थेट विजेच्या खांबावर आदळली आणि तशीच घरात घुसली. या भीषण अपघातात चिमुकलीचा जागीच मृत्यू झाला आहे. या घटनेनंतर परिसरातील नागरिकांनी कारचालकाला तातडीने पकडलं आणि बेदम चोप दिला. पोलिसांनी आरोपीला ताब्यात घेतलं असून, पुढील तपास पोलिसांकडून सुरू आहे.

नागपूर शहरातील मानकापूर पोलीस ठाण्याच्या हद्दीत एका चिमुकलीचा अपघाती मृत्यू झाला आहे. माहेरा कौसर अशफाक सय्यद असे ९ वर्षीय चिमुकलीचे नाव आहे. ही चिमुकली घरासमोर खेळत होती. अचानक एक भरधाव वेगाने कार आली. तिने चिमुकलीला उडवले. नंतर कार विजेच्या खांबाला धडकली. या भीषण अपघातात मुलीचा जागीच मृत्यू झाला.