Ranjeet Kasle: 'मी पुण्यात येईल, मला अटक करा' रणजीत कासलेचा आणखी एक व्हिडिओ समोर

गेल्या काही दिवसांपासून निलंबित पोलीस अधिकारी रणजित कासले आपल्या विधानांमुळे आणि व्हायरल व्हिडिओमुळे चर्चेत आहे. वाल्मिक कराडच्या एनकाऊंटरसाठी सुपारी दिल्याचा दावा त्याने आपल्या व्हिडिओतून केला होता. कासलेच्या दाव्यामुळे राजकीय वर्तुळात खळबळ उडाली होती. सध्या कासलेचा एक नवा व्हिडिओ समोर आला आहे. या व्हिडिओमध्ये कासलेने स्वत: पुण्यात येणार असल्याची माहिती दिली आहे. 'मी पुण्यात येईल, मला अटक करा' अशी विनंती त्याने केली आहे.

कासले व्हिडिओमध्ये नेमकं काय म्हणाला?

व्हिडिओमध्ये कासले, 'मी पुण्यात रात्री ९ वाजता पोहोचतोय, मला अटक करा', असं त्याने थेट सांगितलं आहे. 'दुपारी ३:१३ ची माझी फ्लाइट होती. दिल्लीहून पुण्यासाठी, ती लेट झाली आहे. मी पावणे सात वाजता दिल्लीहून निघणार असून, रात्री ९ वाजता विमानतळावर पोहोचेन', अशी माहितीही त्याने दिली. तसेच 'माझे दिल्लीतील लोकेशन साम टीव्हीने ओळखले आहे', असंही त्याने व्हिडिओत म्हटलं आहे.

'पोलिसांनी मला ताब्यात घ्यावं आणि बीड पोलिसांच्या ताब्यात द्यावं', अशी विनंती कासलेने व्हिडिओतून केली आहे. यावेळी कासले याने बैलगाडा शर्यतीच्या मालक पंढरीनाथ फडके यांच्या गाण्याचा संदर्भ देत भावना स्पष्ट केल्या. त्याने आपले विमानाचे तिकीट देखील शेअर केले आहे.

पबमधील रणजीत कासलेचा व्हिडिओ व्हायरल

रणजीत कासलेचे अनेक धक्कादायक व्हिडिओ समोर येत आहेत. अशातच कासलेने इन्स्टाग्रामवर तीन फोटो शेअर केले आहेत. लेट नाईट पार्टी केल्याचा एक पबमधील व्हिडिओही सोशल माध्यमांवर अपलोड केला आहे.

एका व्हिडिओमध्ये कासलेने 'गब्बर इज बॅक' असं कॅप्शन देऊन गाडीचा व्हिडिओ अपलोड केला आहे. हा व्हिडिओ दिल्लीतील असल्याचं बोललं जात आहे.

रणजीत कासले नक्की आहे तरी कोण?

रणजीत कासले हा निलंबित पीएसआय आहे. काही गंभीर गुन्ह्यांमध्ये त्याची चौकशी सुरू आहे. कासलेचे अनेक व्हिडिओ सोशल मीडियात व्हायरल होतात. सध्या पोलीस कासलेचा शोध घेत आहेत.