Shocking News : डोंबिवलीत हत्येचा थरार! किरकोळ कारणावरून तरुणाची हत्या, पोलिसांनी काही तासात आवळल्या हल्लेखोरांच्या मुसक्या

संघर्ष गांगुर्डे, डोंबिवली

डोंबिवलीतून मोठी बातमी समोर आली आहे. डोंबिवलीतील मालवण किनारा हॉटेलसमोर शनिवारी रात्री उशिरा हत्येचा थरार घडला. धक्का लागल्याच्या शुल्लक कारणावरून हाणामारीवरून थेट हल्ला करण्यात आला. याप्रकरणी मानपाडा पोलिसांनी अवघ्या ४८ तासांत शिताफीने कारवाई करत सर्व सहा आरोपींना अटक केली आहे.

मिळालेल्या माहितीनुसार, मृत तरुणाचे नाव आकाश सिंग असून तो नवी मुंबई येथे कॉल सेंटरमध्ये नोकरी करत होता. शनिवारी रात्री मृत आकाश व आरोपी डोंबिवलीतील मालवण किनारा हॉटेलमध्ये जेवणासाठी आले होते. जेवण झाल्यानंतर बाहेर पडताना किरकोळ धक्का लागल्यावरून आकाश आणि एका तरुणामध्ये वाद झाला. या किरकोळ वादाचे रुपांतर क्षणात हाणामारीत झाले आणि सहा आरोपींनी आकाशवर धारदार शस्त्राने हल्ला चढवला. गंभीर जखमी अवस्थेत आकाशचा घटनास्थळीच मृत्यू झाला.

घटनेनंतर आरोपी पसार झाले होते. मानपाडा पोलिसांनी तातडीने हत्या गुन्हा नोंदवत तपास सुरू केला. परिसरातील सीसीटीव्ही फुटेज तपासून आणि तांत्रिक पुरावे गोळा करून पोलिसांनी आरोपींचा माग काढला. पोलिसांनी नाशिक, मालेगाव आणि चाळीसगाव परिसरात सापळा रचून सर्व आरोपींना अटक करण्यात यश मिळवले.

अमर राजेश महाजन (३६), अक्षयकुमार शंकर वागळे (२६),अतुल बाळु कांबळे (२४),निलेश मधुकर ठोसर (४२),प्रतिकसिंग प्रेमसिंग चौहान (२६),लोकेश नितीन चौधरी (२४) अशी अटक केलेल्या आरोपींचे नावे आहेत. पोलिसांनी आरोपींना न्यायालयात हजर केले असून पुढील तपास मानपाडा पोलीस करत आहेत. या घटनेने संपूर्ण डोंबिवली परिसरात एकच खळबळ उडाली होती . ४८ तासाच्या आत पोलिसांनी सर्व सहा आरोपींना बेड्या ठोकल्यामुळे पोलिसांचे सर्व स्तरातून कौतुक होत आहे.