Shocking News : नवी मुंबई हादरली! हॉटेल मॅनेजमेंट करणाऱ्या तरुणीने इमारतीच्या १०व्या मजल्यावरून उडी मारून आयुष्य संपवलं

नवी मुंबईतून धक्कदायक बातमी समोर आली आहे. तळोजा येथील एका इमारतीच्या दहाव्या मजल्यावरून उडी मारून अल्पवयीन मुलीने आपलं जीवन संपवल्याची घटना घडली आहे. सदर घटना ही रविवारी दुपारच्या सुमारास घडली असून या घटनेने परिसरात भीतीचे वातावरण पसरले आहे. पोलीस या घटनेचा सविस्तर तपास करत आहेत.

मिळालेल्या माहितीनुसार, सदर मृत मुलगी पनवेलमध्ये हॉटेल मॅनेजमेंटचा कोर्स करत होती. ती तिच्या पालकांसोबत इमारतीच्या १० व्या मजल्यावर राहत होती. तिची मोठी बहीण पुण्यात काम करते आणि आठवड्याच्या शेवटी तिच्या पालकांना भेटायला येते. तिचे वडील एका खाजगी कंपनीत काम करतात. २६ ऑक्टोबर रोजी, तिचे वडील कामावर गेले होते आणि तिची आई तिच्या आजारी आईची काळजी घेण्यासाठी सातारा येथील तिच्या मूळ गावी गेली होती. यादरम्यान रविवारी ती एकटीच घरी होती.

घरात कोणीही नसल्याचं बघून या मुलीने घरातील बाल्कनीत जाऊन खाली उडी मारली. या घटनेनंतर इमारतीतील नागरिक परिसरात जमले. इमारतीतील घडलेल्या घटनेची माहिती पोलिसांना दिली. मिळालेल्या माहितीनुसार पोलीस तातडीने घटनास्थळी दाखल झाले. तिला तातडीने रुग्णालयात नेण्यात आले, जिथे तिला मृत घोषित करण्यात आले.

दरम्यान पोलिसांनी मुलीचा मृतदेह शवविच्छेदनासाठी पाठवला आहे. मात्र या मुलीने उडी का मारली? ही आत्महत्या होती की घातपात हे अद्यापही कळू शकलेलं नाही. पोलीस या घटनेचा तपास करत असून मृत मुलीच्या कुटुंबियांवर दुःखाचा डोंगर कोसळला आहे.