Hotel Taj: महाराष्ट्रात आणखी एक उभा राहणार ताज; मुख्यमंत्र्यांनी विनंती करताच एका मिनिटात केली घोषणा

मुंबई म्हटलं की, लगेच आपल्या डोळ्यासमोर इंडिया गेट आणि ताज हॉटेल येत असते. मुंबईच्या सौंदर्यात भर घालण्यात ताज हॉटेलचा मोठा वाटा आहे. आता महाराष्ट्रात अजून नवीन ताज हॉटेल उभारलं जाणार आहे. हे नवीन ताज हॉटेल महाराष्ट्राची उपराजधानी नागपूरमध्ये उभारलं जाणार आहे. मुख्यमंत्री देवेंद्र फडणवीस यांच्या विनंतीला मान देत ताज ग्रुपने हॉटेल उभारण्याची घोषणा केलीय.

मुख्यमंत्री देवेंद्र फडणवीस यांनी नागपुरात ताज हॉटेलची निर्मिती झाली पाहिजे, अशी इच्छा व्यक्त केली. ज्या कार्यक्रमात मुख्यमंत्र्यांनी इच्छा व्यक्त केली त्याच कार्यक्रमात मुख्यमंत्र्यांचं भाषण होताच ताज ग्रुपने मिनिटातच नागपुरात ताज हॉटेल उभारण्याची घोषणा केली. त्यामुळे आता नागपूरकरांना लवकरच ताजमध्ये जाण्याचा योग येणार आहे.

मुंबईतील वांद्रे येथे ताज ग्रुपकडून एका हॉटेलची उभारणी होतेय. यावेळी आयोजित कार्यक्रमात मुख्यमंत्री फडणवीस यांनी नागपुरातही ताज हॉटेल असावं अशी इच्छा व्यक्त केली. त्यानंतर ताज ग्रुपने हॉटेल उभारणीची घोषणा केली. दरम्यान नागपूरमध्ये एक जिंजर हॉटेल आहे, त्यात आणखी एका हॉटेलची भर पडणार आहे.

काय म्हणाले फडणवीस

वांद्रे परिसरात सुंदर हॉटेलची उभारणी केली जात आहे. त्याबद्दल मी इंडियन हॉटेलचे आभार मानतो. हे हॉटेल रतन टाटा यांच्या अत्यंत जवळचे होतं. हॉटेल उभारणीत काही अडचणी येत असल्याचं त्यांनी एकदा मला सांगितलं होतं. या हॉटेलच्या प्लानिंग आणि डिझाईनमुळे मुंबईच्या सुंदरतेत आणखी भर पडेल. ताज ग्रुपच महाराष्ट्रात चांगलं मोठं स्थान आहे.

पण ताज ग्रुपचं नागपुरात हॉटेल नाहीये. ताज ग्रुपने नागपुरात हॉटेल उभारलं पाहिजे. तुम्ही आजच याबाबतची घोषणा करावी, अशी माझी इच्छा आहे, असं मुख्यमंत्री र फडणवीस म्हणाले. त्यानंतर त्यांचे भाषण संपल्यानंतर ताज ग्रुपकडून त्याबाबत घोषणा करण्यात आली.

दरम्यान वांद्रेमध्ये उभारण्यात येणाऱ्या हॉटेलविषयी बोलताना मुख्यमंत्री फडणवीस म्हणाले, 21 व्या शतकातील मॉन्यूमेंट म्हणून या हॉटेलकडे पाहिलं जाईल, असा विश्वास मुख्यमंत्र्यींनी व्यक्त केला. हॉस्पिटॅलिटीची व्याख्या बदलली आहे. अनेक देशात ताज ग्रुपचं प्रस्थ आहे. त्यामुळे परदेशातही आपण मुंबई किंवा भारतातच आहोत, असं वाटतं, असं फडणवीस म्हणाले.

रतन टाटा यांच्या जाण्याआधी हे हॉटेल उभं राहिलं असतं किंवा भूमिपूजन झालं असतं तर त्यांना आनंद झाला असता. कदाचित आम्हीही त्यातील समस्या सोडवण्यात कमी पडलो. प्रकल्प उभारणी संदर्भात काही अडचणी आल्या तर आम्ही पाठीमागे उभं राहू, मुंबईला आणखी अशा हॉटेलची अपेक्षा असल्याचं मुख्यमंत्री म्हणाले.