Post Office Scheme : १ लाख गुंतवा अन् ₹४५,००० मिळवा व्याज; पोस्टाची भन्नाट योजना आताच करा नोट

Post Office Scheme: गुंतवणूक केल्याने भविष्यात अडचणीच्या वेळी तुम्हाला खूप फायदा होतो. अनेकांच्या हातात पैसा टिकत नाही, आणि ऐनवेळी त्यांना इतरांसमोर हात पसरावे लागतात. पण जर तुम्ही पोस्टाच्या काही चांगल्या परतावा देणाऱ्या योजनांमध्ये गुंतवणूक केलीत तर तुम्हाला खूप फायदा होईल. पुढील योजनेत तुम्हाला १ लाख रुपये जमा केल्यावर तब्बल ४५ हजारांचं व्याज मिळेल. संपूर्ण माहिती जाणून घेण्यासाठी बातमी शेवटपर्यंत वाचा.

मुळात ही पोस्ट ऑफीसची टाइम डिपॉझिट योजना आहे. यात गुंतवणूक करणं सुरक्षित आहे. कारण ही योजना सरकारद्वारे सुरु करण्यात आली आहे. यात तुम्ही १,२,३ आणि ५ वर्षांसाठी खातं उघडू शकता. तुम्हाला यामध्ये १ हजारांपासून खात्यात गुंतवणूक करता येते. तेही कोणत्या मर्यादेशिवाय.

तुम्ही गुंतवलेल्या पैशांवर तुम्हाला एकूण ६.९ टक्के व्याज मिळत. हा कालावधी १ वर्षांच्या मुदतीचा आहे. मग २ वर्षांच्या ठेवींवर ७ टक्के, ३ वर्षांच्या ७.१ आणि पाच वर्षांच्या ७.५ टक्के इतकं व्याज तुम्हाला मिळतं. हे व्याज दर तीन महिन्यांनी तुमच्या रक्कमेमध्ये जोडलं जातं. याचं तुम्हाला चक्रवाढ व्याज मिळतं. हे व्याज तुम्हाला वर्षाच्या शेवटी मिळतं. तुम्ही हे तुमच्या मुद्दलीमध्ये सुद्धा जमा करु शकता.

समजा तुम्ही ५ वर्षांसाठी १ लाख रुपये गुंतवलेत तर तुम्हाला ७.५ टक्के व्याजाने म्हणजेच त्रैमासिक चक्रवाढीने मॅच्युरिटी होते. त्यावेळी तुम्हाला एकूण १,४४,९९५ रुपये मिळतात. त्यामुळे या खास योजनेत नक्कीच सहभाग घ्या. याने तुम्हाला भविष्यात खूप फायदा होईल.