McDonalds Buisness : मॅकडोनाल्ड्सवर संसदेत बंदी घालण्याची मागणी; प्रसिद्ध कंपनीचा व्यवसाय किती कोटींचा आहे? जाणून घ्या

सध्या संसदेत पावसाळी अधिवेशन सुरु आहे. या अधिवेशनात ऑपरेशन सिंदूरवरील चर्चेदरम्यान काँग्रेस खासदार दीपेंदर सिंग हुड्डा यांनी सोमवारी सांगितले की, डोनाल्ड ट्रम्प यांनी गप्प बसवा अन्यथा देशातील अमेरिकन कंपनी मॅकडोनाल्ड्स बंद करा, या विधानानंतर सोशल मीडियावर मॅकडोनाल्ड्सची खूप चर्चा होत आहे. पण तुम्हाला माहिती आहे का या अमेरिकन बर्गर बनवणाऱ्या कंपनीचा व्यवसाय किती मोठा आहे? त्यांच्या किती देशांमध्ये शाखा आहेत?

जगभर बर्गर म्हणून प्रसिद्ध असलेली मॅकडोनाल्ड्स कंपनी ही १९४० मध्ये अमेरिकेत सुरू झाली होती. सध्या ७१ देशांमध्ये या कंपनीची आउटलेट्स सुरु आहेत. केवळ अमेरिकेतच नव्हे तर भारतासारख्या उदयोन्मुख देशांमध्येही मॅकडोनाल्ड्सची उपस्थिती मोठ्या प्रमाणात आहे. या कंपनीचे बाजारमूल्य सुमारे २१३.४२ अब्ज डॉलर्स, म्हणजेच जवळपास १८ लाख कोटी रुपये इतके आहे. ही फास्ट फूड कंपनी केवळ बर्गर विकणारी संस्था नसून ती जगातील ७१ वी सर्वाधिक मौल्यवान कंपनी म्हणून ओळखली जाते. या कंपनीचे सध्याचे सीईओ क्रिस्टोफर जॉन केम्प्झिन्स्की आहेत.

सध्या मॅकडोनाल्ड्सबाबत कोणताही अधिकृत निर्णय भारत सरकारने घेतलेला नाही. मात्र, सोशल मीडियावर लोक या कंपनीला टार्गेट करत वेगवेगळ्या मागण्या करत आहेत. काहींनी कंपनी बंद करण्याच्या मागणीचा तिच्या जागतिक ब्रँड मूल्यावर परिणाम होईल का, यावरही प्रश्न उपस्थित केले आहेत. तर दुसरीकडे, अनेकजण म्हणत आहेत की अशा कंपन्या भारतात हजारो लोकांना रोजगार देतात, त्यामुळे भावनिक प्रतिक्रिया देण्याऐवजी तथ्यात्मक चर्चा गरजेची आहे.

एकंदरित, दीपेंदर सिंग हुड्डा यांच्या एका विधानाने मॅकडोनाल्ड्सच्या जागतिक साम्राज्यावर लक्ष वेधलं आहे. हे विधान केवळ राजकीय नसून, जागतिक व्यापार आणि भारतातील बहुराष्ट्रीय कंपन्यांच्या उपस्थितीबाबत नव्याने चर्चा सुरू करण्यास कारणीभूत ठरत आहे.