Ladki Bahin Yojana: ...तोपर्यंत फेब्रुवारीचे १५०० रुपये मिळणार नाहीत; लाडक्या बहिणींचं टेन्शन वाढलं!

लाडकी बहीण योजनेच्या लाभार्थ्यांची सध्या पडताळणी सुरु आहे. लाडकी बहीण योजनेतून आतापर्यंत ५ लाख महिलांना अपात्र करण्यात आले आहे. यामध्ये इतर योजनांचा लाभ घेत असलेल्या महिलांचा समावेश आहे. तसेच चारचाकी असणाऱ्या महिलांचाही समावेश आहे. दरम्यान, आता पात्र महिलांना पैसे कधी मिळणार असा प्रश्न विचारला जात आहे. दरम्यान, आता सर्व महिलांच्या अर्जांची पडताळणी पूर्ण झाल्यानंतरच महिलांना पैसे मिळणार असल्याची माहिती आता समोर आली आहे.(Ladki Bahin yojana)

लाडकी बहीण योजनेअंतर्गत तालुका, जिल्हास्तरीय समितीकडून अर्जांची पडताळणी होऊ शकली नाही. विधानसभा निवडणुकीनंतर योजनेसंदर्भात अनेक तक्रारी येत होत्या. त्यामुळे आता अर्जांची पडताळणी सुरु झाली आहे. पाच टप्प्यांमध्ये ही पडताळणी होणार आहे. सध्या चारचाकी वाहनांची पडताळणी सुरु आहे. (Ladki Bahin Yojana)

पडताळणीचा अहवाल आठ दिवसांत सादर केली जाणार आहे. त्यानुसार अपात्र ठरलेल्या बहि‍णींबाबतचा निर्णय राज्यस्तरावरुनच होणार आहे. त्यानंतर लाडक्या बहि‍णींना फेब्रुवारीचा हप्ता दिला जाणार आहे. परंतु आता पडताळणी होण्यासाठी वेळ लागेल. त्यामुळे हप्त्यासाठी मार्च उजाडेल अशी माहिती सूत्रांनी दिली आहे.

लाडकी बहीण योजनेत आतापर्यंत साडेपाच लाख महिलांचे अर्ज बाद ठरले आहेत. यामध्ये उत्पन्न, चारचाकी वाहन असलेल्या महिलांचा समावेश आहे. याचसोबत काही महिलांनी संजय गांधी निराधार योजना आणि नमो शेतकरी योजनेचा लाभ घेतलेला आहे.