Ladki Bahin Yojana: आता अपात्र लाडक्या बहिणींवर कारवाई होणार; आदिती तटकरेंची मोठी घोषणा

लाडकी बहीण योजनेसंदर्भात मोठी बातमी समोर आली आहे. आता लाडकी बहीण योजनेतून अपात्र ठरणाऱ्या महिलांवर कारवाई होणार असल्याचे आदिती तटकरेंनी सांगितलं आहे. राज्यात लाडकी बहीण योजनेतून तब्बल २६ लाख महिला अपात्र ठरल्याची माहिती स्वतः आदिती तटकरेंनी दिली होती. त्यानंतर आता या महिलांची छाननी सुरु आहे. याबाबतच महिला व बालविकास मंत्री आदिती तटकरेंनी मोठं विधान केलं आहे.

आदिती तटकरे काय म्हणाल्या? (Aditi Tatkare On Ladki Bahin Yojana)

लाडकी बहीण योजनेतील अपात्र लाभार्थ्यांची आता जिल्हास्तरीय छाननी सुरु आहे, याबाबत आदिती तटकरेंनी माहिती दिली. २६ लाख लाभार्थी योजनेच्या निकषानुसार या महिला पात्र दिसून येत नसल्याबद्दल माहिती व तंत्रज्ञान विभागाने प्राथमिक माहिती दिली आहे. सर्व जिल्ह्यांमधील २६ लाख महिलांचा यामध्ये समावेश आहे. आता त्यानुसार महिला व बालविकास विभागाने याबाबत यंत्रणेला छाननीसाठी माहिती उपलब्ध करुन दिली आहे. त्यानुसार, हे लाभार्थी योजनेच्या निकषानुसार पात्र ठरतात किंवा नाही याबाबतची छाननी सुरु आहे. छाननी पूर्ण झाल्यानंतर किती लाभार्थी पात्र आणि अपात्र हे स्पष्ट होणार आहे.

छाननी पूर्ण झाल्यानंतर जे लाभार्थी अपात्र ठरतील त्यांच्याबाबत देवेंद्र फडणवीस, एकनाथ शिंदे आणि अजितदादा पवार यांच्या मार्गदर्शनानुसार योग्य कारवाई केली जाईल. तसेच पात्र लाभार्थ्यांचा लाभ यापुढेही पूर्ववत राहील, असं आदिती तटकरेंनी सांगितलं आहे.

लाडकीच्या नावाखाली कोट्यवधी रुपये लाटले

राज्य सरकारच्या लाडकी बहीण योजनेत गैरव्यव्हार झाल्याचे समोर आले आहे. लाडकी बहीण योजनेत २६ लाख अपात्र महिलांनी लाभ घेतला आहे. यामुळे राज्य सरकारचे कोट्यवधी रुपये लाटले आहेत. आता या लाभार्थ्यांवर कारवाई केली जाणार आहे. दरम्यान, आता सर्व महिलांना केवायसी करणे अनिवार्य असणार आहे. सर्व लाभार्थी महिलांना केवायसी करावी लागणार आहे. त्यानुसार, महिलांच्या अर्जांची पुन्हा पडताळणी केली जाणार आहे.