Onion Export: बांगलादेशात पाकिस्तानाचा कांदा; भारतीय शेतकऱ्यांचा वांदा,केंद्र सरकारच्या धोरणानं शेतकऱ्यांना पुन्हा रडवलं

कांदा उत्पादक शेतकऱ्यांची चिंता वाढवणारी बातमी आहे. भारतीय कांद्याचे प्रमुख आयातदार असलेले बांगलादेश, सौदी अरब आणि फिलिपिन्स या देशांनी भारतीय कांद्याकडे पाठ फिरवलीय. त्याचा फटका देशातील शेतकऱ्यांना बसलाय. केंद्र सरकारच्या धोरणामुळे शेतकऱ्यांना फटका बसलाय. देशातील महागाई कमी करण्यासाठी कांद्याच्या निर्यातीवर बंधणं आणल्यानं हे देश पाकिस्तान येमेन आणि इराणकडून कांदा मागवत आहेत.

महत्त्वाच्या बाजारपेठा गमावल्यामुळे कांद्याचा दर घसरलाय. त्यामुळे शेतकऱ्यांना उत्पादन खर्चही काढणं अवघड झालंय. भारतीय कांद्याच्या निर्यातीत मोठी घट होण्यामागे केवळ देशांतर्गत धोरणेच नव्हे, तर आयातदार देशांनी घेतलेले निर्णयही जबाबदार आहेत. देशातील महागाई नियंत्रित ठेवण्यासाठी केंद्र सरकारने वारंवार कांदा निर्यात शुल्क वाढवले. अस्थायी निर्यात बंदी यासारखे निर्णय घेतल्यानं आंतरराष्ट्रीय बाजारपेठेत भारतीय निर्यातदारांची विश्वासार्हता कमी झालीय.

हिंदुस्तान टाईम्सने दिलेल्या वृत्तानुसार निर्यातबंदीच्या निर्णयामुळे बांगलादेशने आता स्थानिक उत्पादन वाढवण्यावर भर दिलाय. यासह त्यांनी पाकिस्तान आणि चीन यांसारख्या पर्यायी पुरवठादारांकडून कांदा खरेदी करण्यास सुरुवात केली आहे. बांगलादेशातील स्थानिक कांदा बाजारात आला आहे, त्यामुळे तेथील व्यापाऱ्यांनी भारताकडून खरेदी करणे जवळपास थांबवलंय. यासह सौदी अरेबियाने भारतीय निर्यातदारांना आयात परवाने देणे थांबवले आहेत.

सौदीला येमेन आणि इराणकडून अधिक स्पर्धात्मक दरात कांदा मिळू लागलाय. दरम्यान भारतीय कांद्याचे बियाणे वापरून बांगलादेश, श्रीलंका आणि चीनसारखे देश आता स्वतः कांद्याचे उत्पादन घेऊ लागलेत. यामुळे शेतकरी अडचणी आलेत. अनेक बाजारांमध्ये शेतकऱ्यांना त्यांच्या उत्पादन खर्चापेक्षा कमी दराने कांदा विकावा लागतोय.