8th Pay Commission : केंद्रीय कर्मचाऱ्यांसाठी मोठी बातमी! वाढीव पगार आणि पेन्शन कधी खात्यात येणार? वाचा अपडेट्स

केंद्र सरकारी कर्मचारी आणि पेन्शनधारक आठव्या वेतन आयोगाच्या शिफारशींची आतुरतेने वाट पाहतायेत. आयोगाकडून पगार आणि पेन्शनमध्ये किती वाढ होणार, फिटमेंट फॅक्टर किती असणार आणि नवीन वेतनश्रेणी कधी लागू होणार, याबाबत अनेक प्रश्न उपस्थित होत आहेत. पण आयोगाने सरकारला अहवाल दिल्यानंतर प्रत्यक्ष वाढीव पगार खात्यात येण्यासाठी किती वेळ लागणार, हे जाणून घेणं महत्त्वाचं आहे.

मे २०२७ पर्यंत अहवाल सादर होण्याची शक्यता

आठव्या वेतन आयोगाची स्थापना होऊन जवळपास एक वर्ष झालं आहे. सध्या आयोगाचे सदस्य देशातल्या विविध शहरांमध्ये कर्मचारी संघटना आणि पेन्शनधारकांच्या प्रतिनिधींशी चर्चा करत आहेत. त्यांच्या मागण्या आणि सूचना जाणून घेतल्या जातायेत. मिळालेल्या माहितीनुसार, आयोग मे २०२७ पर्यंत केंद्र सरकारला आपला अहवाल सादर करू शकतो.

अहवालानंतर सरकार घेणार अंतिम निर्णय

आयोगाने अहवाल सादर केल्यानंतर लगेचच वाढीव पगार मिळेल, असं नाही. केंद्र सरकार आयोगाच्या शिफारशींचा अभ्यास करेल. कोणत्या शिफारशी स्वीकारायच्या, यावर निर्णय घेतला जाईल. तसेच नवीन वेतनश्रेणी लागू करण्यासाठी किती आर्थिक तरतूद करावी लागेल, याचाही विचार केला जाईल.

फिटमेंट फॅक्टर ठरवणार पगारवाढ

आठव्या वेतन आयोगात फिटमेंट फॅक्टर महत्त्वाची भूमिका बजावणार आहे. सहाव्या वेतन आयोगात १.८६, तर सातव्या वेतन आयोगात २.५७ फिटमेंट फॅक्टर होता. यावेळी कर्मचारी संघटनांकडून ४ पर्यंत फिटमेंट फॅक्टरची मागणी केली जात आहे. मात्र, अंतिम आकडा सरकारच्या निर्णयावर अवलंबून असेल.

वाढीव पगार कधी मिळणार?

अंदाजानुसार, सरकार २०२७ च्या अखेरपर्यंत आठव्या वेतन आयोगाच्या शिफारशींवर अंतिम निर्णय घेऊ शकते. त्यानंतर संबंधित विभाग पगारवाढीचं गणित तयार करतील. त्यामुळे प्रत्यक्ष वाढीव पगार आणि पेन्शन खात्यात जमा होण्यासाठी आणखी काही महिने लागू शकतात.