बाजारात इको फ्रेंडली गणपती मूर्तींना मोठी मागणी आहे. यंदा इको फ्रेंडली गणपतीची विक्री मोठ्या प्रमाणात झाली. इको फ्रेंडली गणपती मूर्ती पर्यावरणासाठी पूरक असतात. कारण प्लास्टर ऑफ पॅरिसच्या मूर्तीमुळे पर्यावरणाला धोका पोहोचतो . याच दरम्यान महाराष्ट्रातील एका शेतकऱ्याने अनोखा उपक्रम केला आहे. गाईच्या शेणापासून त्याने गणपतीच्या मूर्ती बनवल्या आहेत. बाजारात देखील या मूर्तींना प्रचंड मागणी आहे.

वाशिम जिल्ह्यातील शेतकरी मनीष देशमुख यांनी १,५०० हून अधिक शेणाच्या गणपतीच्या मूर्ती बनवल्या आहेत. त्यांच्या या मूर्तींना बाजारात मोठ्या प्रमाणात मागणी आहे. मनीष देशमुख यांनी सांगितले की, मागील वर्षी त्यांनी शेणाच्या मूर्ती बनवायला सुरूवात केली आहे. त्यांनी ६०० मूर्ती तयार केल्या होत्या. यामध्ये १ लाख रूपयांचा नफा झाला होता. भाविकांनी दिलेल्या प्रतिसादामुळे त्यांनी यावर्षी उत्पादन वाढले आणि सुमारे २ लाख रूपयांची कमाई करण्याची अपेक्षा ठेवली आहे. मात्र हा केवळ नफा नाहीतर पर्यावरणासाठी चांगला उपक्रम असल्याचे सांगितले.

शेणापासून बनवलेल्या मूर्तीचे मुख्य वैशिष्ट्य म्हणजे विसर्जन. पीओपीच्या मूर्ती या पर्यावरणासाठी घातक आहेत. देशमुख यांनी बनवलेल्या मूर्तीचे खत तयार होते. पिकांसाठी देखील याचा वापर होतो. गणपती बाप्पा आपल्याला निसर्गाचे रक्षण आणि संगोपन करायला शिकवतात हेच उदाहरण समोर ठेवून आम्ही हा उपक्रम सुरू केला आहे.

हा उपक्रम अनेकांच्या उपजिविकेचे साधन देखील बनला आहे. यावर्षी त्यांनी १० बेरोजगार तरूणांना रोजगार उपलब्ध करून दिला. ज्यांनी ही कला शिकली आणि उत्पादनात हातभार लावला. यावरून प्रेरणा घेत देशमुख यांनी अगरबत्ती आणि शेणापासून बनवलेल्या इतर उत्पादनांवर प्रयोग करण्यास सुरूवात केली आहे.