ऑफिसमधून सुट्टी पाहिजे असेल तर आपल्याला बॉसला विविध कारणं द्यावी लागतात. कधी तब्येत बरी नाही, कधी घरी इमरजेंसी आहे अशी कारणं देऊन सुट्टी मागावी लागते. तर काही लोकं अगदी खोटं बोलूनही सुट्टी मागतात. पण तुम्ही कधी ऐकलंय का की, गर्लफ्रेंडला भेटायला जायचंय म्हणून कोणी सुट्टी मागितली. आता तुम्हाला हे वाचून नक्कीच हसू येईल. मात्र अशी घटना खरंच घडलीये.

सध्या काळानुसार लोकं एकमेकांच्या समस्या समजू लागलेत. नुकतंच प्रोफेशनल नेटवर्किंग लिंक्डइनवर एका मॅनेजरने पोस्ट शेअर केली. ज्यामध्ये ऑफिसच्या सुट्ट्यांबाबत लोकांचा दृष्टीकोन बदलत असल्याचं समोर आलं आहे.

ही पोस्ट सोशल मीडियावर वेगाने व्हायरल झाली. ज्यामध्ये अनेकांनी त्यांचं मतही दिलं. या पोस्टमध्ये एक स्क्रिनशॉट शेअर करण्यात आला होता. यामध्ये ऑफिसमध्ये काम करणाऱ्या कर्मचाऱ्याने पर्सनल कारण सांगत १६ डिसेंबर रोजी सुट्टी मागितली होती.

मेलमध्ये काय लिहिलं होतं?

या इमेलमध्ये लिहिण्यात आलं होतं की, त्याची गर्लफ्रेंड 17 डिसेंबरला तिच्या घरी म्हणजे उत्तराखंडला जाणार आहे. ती जानेवारीपूर्वी पुन्हा येणार नाही, असंही त्यामध्ये नमूद करण्यात आलं होतं. अशा परिस्थितीत तिला भेटण्यासाठी आणि तिच्यासोबत वेळ घालवण्यासाठी सुट्टीची रिक्वेस्ट करण्यात आली होती.

मॅनेजरने त्याच्या पोस्टमध्ये काय म्हटलं?

याचा स्क्रिनशॉट शेअर करताना मॅनेजरने आपल्या पोस्टमध्ये म्हटलं की, मला हा मेसेज माझ्या इनबॉक्समध्ये आला. जर ही गोष्ट १० वर्षांपूर्वीची असती तर सकाळी बरोबर ९.१५ वाजता मला सिक लीवचा मेसेज आला असता. आता कर्मचारी स्वतः खरं-खरं कारण सांगून सुट्टी मागतात. आता काळ बदललाय आणि खरं सांगायचं तर हे मला खूप आवडलंय. प्रेमापुढे कोणी काही करू शकत नाही. त्यामुळे सु्ट्टीला मंजूरी.

मॅनेजरने ही पोस्ट करून जाहीर केलं आहे की, पर्सनल गोष्टींसाठी लोकं विविध-पद्धतीचे बहाणे तयार करायचे. यावेळी त्या मॅनेजरने जुन्या काळात ऑफिसचं वातावरण कसं असायचं आणि लोकं पर्सनल गोष्टी शेअर करत नव्हते असं म्हटलंय. तर आता ऑफिसमधील विचार आणि व्यवहार या दोघांमध्ये बदल पाहायला मिळतोय.