महाराष्ट्रात सुरु असलेल्या मराठी हिंदी भाषिक वादाने राजकारणात देखील शिरकाव केला. सरकारने काढलेला हिंदी सक्तीचा जीआर महायुती सरकारने मोडीस काढत महाराष्ट्रातील मराठी भाषिक जनतेला दिलासा दिला. महाराष्ट्रात हिंदी नको यासाठी ठाकरे बंधूनी कंबर कसली आणि हिंदी सक्तीचा जीआर मागे घेण्यासाठी सरकारला भाग पाडले.

या घटनेचा आनंद व्यक्त करण्यासाठी शनिवारी वरळीत झालेल्या विजयी सोहळ्याच्या निमित्ताने ठाकरे बंधू तब्बल २० वर्षांनी एकत्र एका मंचावर महाराष्ट्र्राला दिसले. ठाकरे बंधूंच्या एकत्र येण्याने महाराष्ट्रातील जनतेला अश्रू अनावर झाले. असाच एक व्हिडिओ सध्या सोशल मीडियावर व्हायरल होत आहे.

शनिवारी वरळीत डोम सभागृहात पार पडलेल्या विजयी सोहळ्याला महाराष्ट्रातील कानाकोपऱ्यातून नागरिक उपस्थित होते. जेवढी गर्दी सभागृहात होती तेवढी गर्दी सभागृहाच्या बाहेर पाहायला मिळाली. ठाकरे बंधूंच्या एकत्रित येण्याने मनसैनिक आणि शिवसैनिकांना अश्रू अनावर झाले. घरी बसलेल्या नागरिकांनी देखील या विजयी सोहळ्याचा आनंद घेतला.

असाच एक व्हिडिओ सोशल मीडियावर व्हायरल होत आहे. ज्यामध्ये एक महिलेला हा विजयी सोहळा पाहताना अश्रू अनावर झाले. ठाकरे बंधू मंचावर एकत्र येताच तिच्या डोळ्यातून पाणी आलं. या व्हिडिओच्या माध्यमातून महाराष्ट्राचं ठाकरे बंधूंवर असलेलं प्रेम दिसून येत आहे. मात्र ही एकजूट राजकारणात दिसणार का ? याकडे संपूर्ण महाराष्ट्राचे लक्ष लागल आहे.