मुंबईतील नागरिकांचे श्रद्धास्थान आणि मानाचा गणपती म्हणून लालबागच्या राजाकडे पहिले जाते. अवघ्या महाराष्ट्रातून भाविक राजाच्या दर्शनासाठी आसुसलेले असतात. गणेश भक्त तब्बल ११ दिवस राजाची मनोभावे पूजा करतात. राजाच्या चरणावर मस्तक ठेवून चरणस्पर्श करण्यासाठी भक्त तासंतास रांगेत उभे असतात. त्यासाठी मंडळाकडून सुरक्षारक्षकांचा कडेकोट बंदोबस्त करण्यात येतो. मात्र या वेळेस लालबागच्या मंडपात या सुरक्षारक्षकांचा मुजोरीपणा पाहायला मिळाला. या घटनेचा व्हिडिओ सोशल मीडियावर व्हायरल होत आहे.

व्हिडिओतील चित्रीकरणाप्रमाणे, लालबागच्या राजाच्या दर्शनासाठी असंख्य भक्त मंडपात दर्शनासाठी उभे होते. जस जशी लाईन पुढे जात होती तसं तसे भाविक राजाच्या चरणी नतमस्तक होत होते. मात्र येथील सुरक्षा रक्षकांनी एका सामान्य कुटुंबातील बाप लेकीला दर्शन घेताना चुकीची वागणूक दिल्याचं समोर आलं आहे.

एक व्यक्ती त्याच्या मुलीला राजाच्या चरणी नतमस्तक होण्यासाठी घेऊन गेला असता तेथील सुरक्षारक्षकाने त्यांना ओढलं. संतापलेल्या चिमुरडीच्या वडिलांनी संताप व्यक्त करत उलट जबाब विचारला असता गेटवरच्या काही सुरक्षारक्षकांनी मुलीला आणि तिच्या वडिलांना खेचत थेट बाहेरचा रास्ता दाखवला.

या घटनेचा व्हिडिओ सोशल मीडियावर व्हायरल होत असून याबाबत अद्याप कोणतीही कारवाई करण्यात आलेली नाही. मात्र सर्वसामान्य माणसांसाठी लालबागचा राजा नाही का ? तो फक्त श्रीमंतांचाच आहे का ? असे प्रश्न उपस्थित केले जात आहेत. दरम्यान या घटनेवर मंडळाकडून आणि पोलीस प्रशासनाकडून कोणती भूमिका घेतली जाते याकडे सगळ्यांचे लक्ष लागले आहे. तसेच समुद्रात आलेल्या भरतीमुळे आणि यावर्षी आणलेल्या नव्या तराफ्यामुळे लालबागच्या राजाच्या विसर्जनाला अडथळे निर्माण होत आहेत २५ तास उलटूनही अद्याप राज्याचे विसर्जन झालेले नाही.