मुंबई : (OlA Electric scooter viral video) सध्या सोशल मीडियावर एक व्हिडिओ व्हायरल होत आहे, ज्यामध्ये एक ग्राहक शोरूमसमोर त्याच्या ओला इलेक्ट्रिक स्कूटरला हातोड्याने तोडताना दिसत आहे. असे सांगण्यात येत आहे की ग्राहकाने ही स्कूटर महिनाभरापूर्वीच खरेदी केली होती, परंतु ती पुन्हा पुन्हा खराब होऊ लागली. कंपनीकडे तक्रार केल्यावर स्कूटरच्या दुरुस्तीसाठी 90 हजार रुपये खर्च झाल्याचे सांगण्यात आल्याने ग्राहक संतप्त झाला. या नवीन स्कुटीची किंमतच एक लाख रूपये आहे. घडायी पेक्षा मडायी जास्त असा अनुभव या ग्राहकाला आला.  या घटनेमुळे ओला इलेक्ट्रिकच्या दर्जावर आणि सेवा व्यवस्थेवर गंभीर प्रश्न निर्माण झाले आहेत.

ग्राहकांच्या तक्रारीमध्ये मोठी वाढ

ओला इलेक्ट्रिक स्कूटरचे वापरकर्ते सतत हार्डवेअर आणि सॉफ्टवेअरशी संबंधित समस्यांच्या तक्रारी करत असतात. अनेक ग्राहकांनी आरोप केला आहे की स्कूटरमध्ये बॅटरी खराब होणे, सॉफ्टवेअर हँग होणे आणि इतर तांत्रिक समस्या नेहमीच्याच झाल्या आहेत. तसेच कंपनीची मर्यादित सेवा केंद्रे आणि महागडे पार्ट्स यामुळे ग्राहकांना त्यांच्या समस्या सोडवण्यासाठी बराच वेळ प्रतीक्षा करावी लागत आहे. ओला इलेक्ट्रीक स्कुटरच्या ग्राहक सेवाला कंटाळून अनेक ग्राहकांनी त्यांच्या गाडीला आग लावल्याचे व्हिडीओ देखील याआधी समोर आले आहेत. 

केंद्रीय ग्राहक संरक्षण प्राधिकरणाची चौकशी

ओला इलेक्ट्रिकच्या सेवेवर आणि ग्राहक तक्रार निवारण प्रणालीवर निर्माण झालेल्या प्रश्नांदरम्यान, केंद्रीय ग्राहक संरक्षण प्राधिकरणाने (CCPA) कंपनीविरुद्ध चौकशीचे आदेश दिले आहेत. तथापि, कंपनीचा दावा आहे की त्यांनी राष्ट्रीय ग्राहक हेल्पलाइन (NCH) वर नोंदवलेल्या10,644 तक्रारींपैकी 99.1 टक्के तक्रारींचे निराकरण केले आहे. तरीही, वाढत्या तक्रारींमुळे कंपनीला CCPA कडून कारणे दाखवा नोटीस मिळाली आहे.

कंपनीची प्रतिष्ठा धुळीला मिळत आहे

या घटनांचा थेट परिणाम ओला इलेक्ट्रिकच्या शेअर्स आणि प्रतिष्ठेवर झाला आहे. अलीकडच्या काही महिन्यांत कंपनीच्या शेअरच्या किमतीत मोठी घसरण झाली आहे. शुक्रवारी हा शेअर 69.19 रुपयांवर बंद झाला, जो 157.40 रुपयांच्या आतापर्यंतच्या उच्चांकापेक्षा 56 टक्क्यांनी कमी झाला. या घसरणीमुळे कंपनीचे मार्केट कॅप 38,000 कोटी रुपयांनी कमी होऊन अंदाजे 31,000 कोटी रुपयांवर आले आहे. खराब उत्पादन गुणवत्ता आणि सेवेशी संबंधित समस्यांमुळे गुंतवणूकदारांचा आत्मविश्वास कमी झाल्याचे तज्ज्ञांचे मत आहे.

Edited by- नितीश गाडगे