मुंबईच्या मरीन ड्राईव्ह परिसरात एका महिलेचा जीव वाचवण्यात पोलिसांना यश आलं आहे. ४० वर्षीय ही महिला समुद्रात उडी टाकून आत्महत्येचा प्रयत्न करत होती. यावेळी पोलिसांनी प्रसांगावधान दाखवत तिला वेळीच पाण्यातून बाहेर काढलं असून तिचा जीव वाचवला आहे. मुख्य म्हणजे ऐन गर्दीच्या वेळी हा प्रकार घडल्याने एकच खळबळ माजली होती. यावेळी पोलिसांनी तिला साहसाने वाचवल्याचा व्हिडीओ सोशल मिडीयावर चांगलाच व्हायरल होतोय.

समोर आलेल्या माहितीनुसार, या ४० वर्षीय महिलेचं नाव सैफी असं आहे. ही महिला मुंबईतील मालाड या परिसरात राहणारी आहे. गुरुवारच्या दिवशी दुपारी २ वाजता मरीन ड्राईव्हमध्ये ती पोहोचली होती. यावेळी ती अचानक समुद्रामध्ये जाऊन आत्महत्येचा प्रयत्न करत असताना आढळून आलं

यावेळी वेळ न दडवता नियंत्रण कक्षाने मरीन ड्राईव्ह पोलिसांच्या ‘मोबाईल युनिट ५’ ला लगेच अर्लट केलं. वायरलेसवरून मेसेज येताच पोलिसांनी घटनास्थळी धाव घेतली. पोलिसांच्या साहसामुळे त्या महिलेचे प्राण वाचण्यास मदत झाली आहे. या महिलेचे प्राण पोलिसांनी कसे वाचवलेत याचा व्हिडीओ सध्या तुफान व्हायरल होतोय.

सोशल मीडियावर व्हिडीओ झाला व्हायरल

यावेळी पोलिसांनी दोरीच्या सहाय्याने तिला बांधून वर खेचलं. समुद्रात जीव देण्यासाठी गेलेल्या या महिलेला सुखरूप बाहेर काढल्यानंतर तिला जवळच्या जीटी रूग्णालयात दाखल करण्या आलंय. तिच्या पायाला दुखापत झाली होती. दरम्यान या महिलेने असं टोकाचं पाऊल का उचललंय हे अद्याप स्पष्ट झालेलं नाही.

मिळालेल्या माहितीनुसार, ही ४० वर्षीय महिला मानसिक तणावाखाली होती. त्यामुळे तिने हे आत्महत्येसारखं पाऊल उचललं. मरीन ड्राईव्ह पोलीस सध्या तिच्या नातेवाईकांशी संपर्क साधतण्याचा प्रयत्न करतायत. वेळेत मदतीला धावून जाणाऱ्या पोलीसांच्या या पथकाचं स्थानिक नागरिकांकडून मोठ्या प्रमाणात कौतुक होताना दिसतंय.