सोशल मीडियावर सध्या एक धक्कादायक व्हिडिओ वेगाने व्हायरल होताना दिसतोय. ज्यामध्ये तीन वर्षांनी घरी परतलेल्या एका व्यक्तीला त्याच्या घराची अवस्था पाहून मोठा धक्का बसतो. रशियातील वोरकुटा शहरातील हा प्रकार असून घराची एक खिडकी उघडी राहिल्यामुळे कबूतरांनी त्याच्या संपूर्ण फ्लॅटवर कब्जा केला होता. हा व्हिडिओ पाहून अनेकजण आश्चर्यचकित झाले होते.

ही व्यक्ती कामानिमित्त सायबेरियात गेली होती. जवळपास तीन वर्षे तो घरापासून दूर होता. घाईगडबडीत त्याच्याकडून घरातील एक खिडकी बंद करायची राहून गेली. याच छोट्या चुकीचा मोठा परिणाम झाला. उघड्या खिडकीतून कबूतरांनी घरात प्रवेश केला आणि हळूहळू संपूर्ण फ्लॅटला आपलं घर बनवलंय.

व्हिडिओमध्ये स्पष्टपणे दिसतंय की, घराच्या प्रत्येक कोपऱ्यात कबूतरं दिसतायत. घरात जवळपास १०० पेक्षा जास्त कबुतरं बसलेली होती. त्यांनी घरातच घरटी तयार केली होती. फर्निचर आणि भिंतींवर मोठ्या प्रमाणात घाण साचलेली होती. घराचा ताबाच कबूतरांनी घेतल्यासारखी परिस्थिती निर्माण झाल्यासारखं दिसतंय.

हा व्हिडिओ @BrianMcDonaldIE या अकाउंटवर शेअर करण्यात आला आहे. अनेक युजर्सने यावर आश्चर्य व्यक्त केलंय. काहींनी प्रतिक्रिया देताना म्हटलंय, 'हे पाहून विश्वास बसत नाही,' तर काहींनी याला 'त्या व्यक्तीची चूक' असल्याचं म्हटलंय.

(डिस्क्लेमर- हा व्हिडीओ सोशल मीडियावर व्हायरल झाला आहे. या व्हिडीओमध्ये किती तथ्य आहे याची खातरजमा आम्ही करत नाही.)