मुंबई : फास्ट फूडच्या जमान्यात प्रत्येकालाच काहीतरी वेगळं आणि चटकदार हवं असतं. पिझ्झा-बर्गरच्या काळात एक पदार्थ प्रचंड लोकप्रिय झालाय तो म्हणजे मोमोज... जिभेचे चोचले पुरवण्यासाठी तरूणाईत मोमोजची मागणी खूपच वाढलीय. मोदकासारखा दिसणारा हा पदार्थ स्टीम केलेला म्हणजेच वाफवलेला असतो त्यामुळे आपण ऑईली पदार्थ खात नाही हीच तरूणाईची भावना असते. मात्र याच मोमोजबाबत एक खळबळजनक मेसेज व्हायरल होतोय. त्यात मोमोज खाणं आरोग्यासाठी अत्यंत घातक असल्याचं म्हंटलंय. व्हायरल मेसेजमध्ये नेमका काय दावा करण्यात आलाय. पाहा..

तुम्ही जर मोमोजचे शौकिन असाल तर वेळीच सावध व्हा, मोमोज खाल्ल्यानं तुम्हाला गंभीर स्वरूपाचे आजार होऊ शकतात. तुमच्या शरीरातील साखरेचं प्रमाण वाढू शकतं. तुम्हाला कॅन्सरही होऊ शकतो, असा मेसेज व्हायरल होत आहे.

मोमोज तर सारेच जण खातात. ऑईली खाणं नको म्हणून तरूणी मोमोजला पहिली पसंती देतात. त्यामुळे व्हायरल मेसेज खरा आहे का ? आम्ही याची पडताळणी केली. मोमोज कोणत्या पदार्थांपासून तयार होतात याची माहिती घेतली.आमच्या इन्व्हेस्टिगेशनमधून काय समोर आलं पाहा.

मोमोज बनवण्यासाठी मैद्याचा वापर केला जातो. खूप जास्त प्रमाणात मैदा खाणं आरोग्यासाठी हानीकारक आहे. मोमोज चवदार बनावेत यासाठी त्यात मोनोसोडियम ग्लूटामेट म्हणजेच MSGचा वापर केला जातो. हे केमिकल कपांऊंड तुमच्या शरीराला नुकसान पोहचवू शकतं. याशिवाय काही मोमोजमध्ये क्लोरिन गॅस आणि बेंजॉईल पॅरॉक्साईडचा वापर केला जातो. ज्यामुळे तुमची शुगर वाढू शकते. मोमोजच्या चटणीत सोडियमचं प्रमाण अधिक असतं. एका सर्व्हेनुसार 5 पैकी 3 व्यक्ती 15 दिवसांत किमान दोन वेळा स्ट्रीट फूड खातात.

मोमोज बनवण्यासाठी वापरल्या जाणाऱ्या पदार्थांमधून मोमोज आरोग्यासाठी किती हानीकारक आहेत हे स्पष्ट झालं. व्हायरल मेसेजमध्ये करण्यात आलेल्या दाव्याबाबत अधिक माहिती आरोग्य तज्ज्ञ देऊ शकतात. त्यामुळे आम्ही त्यांना हा मेसेज दाखवला आणि त्यांच्याकडूनही सत्य जाणून घेतलं. त्यामुळे आमच्या पडताळणीत काय सत्य समोर आलं.

जास्त प्रमाणात मोमोज खाल्ल्यानं गंभीर आजार उदभवू शकतात. कलरमिश्रित आणि तिखट मोमोज असतील तर शरीरातील हाडं कमकुवत होऊ शकतात. तसंच मूळव्याधीचीही समस्या उदभवू शकते. मात्र मोमोजमुळे कॅन्सर होतो असं संशोधनातूत स्पष्ट झालेलं नसल्याचं वैद्यकीय तज्ज्ञांचं म्हणणंय.

आमच्या पडताळणीत सातत्यानं मोमोज खाल्ल्यानं गंभीर आजार होत असल्याचा दावा सत्य ठरलाय. अर्थात सगळेच दुकानदार मोमोज बनवण्यासाठी घातक पदार्थांचा वापर करतातच असं नाही. ज्या मोमोजमध्ये भेसळ नसते अशा मोमोजचा रंग काहीसा पिवळसर असतो. त्यामुळे संभाव्य धोके लक्षात घेऊन मोमोज किती प्रमाणात खावेत, भेसळ कशी ओळखावी याची खूणगाठ बांधून घ्या.