ऑनलाईन किराणा सेवा पुरवणाऱ्या झेप्टो (Zepto) कंपनीला नागपूर खंडपीठाने मोठा दणका दिला आहे. महाराष्ट्रात तंबाखूयुक्त पानमसाल्यावर बंदी असतानाही झेप्टोमार्फत हे पदार्थ ऑनलाइन विकले जात असल्याची गंभीर बाब समोर आली आहे.

या प्रकरणी नागपूरमधील रोहन जयस्वाल या नागरिकाने कोर्टात याचिका दाखल केली होती. त्यावर सुनावणी करताना हायकोर्टाने स्पष्टपणे निर्देश दिले की, झेप्टोने बंदी असलेल्या तंबाखूयुक्त पानमसाल्याची ऑनलाइन विक्री करून कायद्याचे उल्लंघन केलं आहे, त्यामुळे झेप्टो कंपनीवर गुन्हा दाखल करण्यात यावा.

कोर्टाने म्हटलं की, प्रतिबंधित पदार्थांची घरपोच सेवा देणं ही गंभीर बाब असून, सरकारच्या आदेशाला आणि सार्वजनिक आरोग्याच्या हिताला धोका पोहोचवणारा प्रकार आहे.दरम्यान, याप्रकरणी प्रशासन आणि संबंधित यंत्रणांकडून तपास सुरू आहे. झेप्टोसारख्या मोठ्या प्लॅटफॉर्मवरून बंदी घालण्यात आलेले पदार्थ विकले जात असल्याची बाब उघड झाल्यानं, इतर कंपन्याही तपासाच्या रडारवर येण्याची शक्यता वर्तवली जात आहे.