Who will get RS ticket from BJP : देशातील ३७ रिक्त राज्यसभा जागांसाठी आयोगाकडून निवडणुकीची घोषणा झाली आहे. यामध्ये सर्वाधिक जागा महाराष्ट्रातील आहेत. सत्ताधारी आणि विरोधकांकडून राज्यसभेच्या जागांसाठी मतांची जुळवाजुळव सुरू करण्यात आली आहे. सत्ताधारी भाजपकडून राज्यात कुणाला संधी मिळणार? या चर्चेने जोर धरला आहे. राज्यातून केंद्राच्या राजकारणात सक्रीय झालेले विनोद तावडे यांना खासदारकीचं गिफ्ट मिळण्याची शक्यता वर्तवली जात आहे. भाजपकडून विनोद तावडे यांच्या नावावर शिक्कामोर्तब होणार का? की आणखी कुणाला संधी दिली जाणार? याबाबत भाजप कार्यकर्त्यांमध्ये उत्सुकता आहे.

राज्यसभेसाठी भाजपमध्ये इच्छुकांची गर्दी झालीय. भाजपकडून विनोद तावडे, रामदास आठवले, विजया रहाटकर, भागवत कराड आणि धैर्यशील पाटील यांच्या नावांची जोरदार चर्चा सुरु झाली आहे. दरम्यान आयाराम नेत्यांना संधी न देता पक्षाशी दिर्घकाळ निष्ठा राखलेल्या कार्यकर्त्यांना संधी द्यावी असा सूर पक्षातून उमटत आहे. मागील काही वर्षांत बाहेरून आलेल्या नेत्यांना राज्यसभा किंवा विधान परिषदेत संधी देण्यात आल्याची नाराजी काही गटांतून व्यक्त होत आहे. त्यामुळे यावेळी तरी निष्ठावंतांचा विचार व्हावा, अशी मागणी जोर धरत आहे. राज्यसभेसाठी भाजपमधील काही नावांची चर्चा सुरू आहे. त्यामध्ये विनोद तावडे, रामदास आठवले, विजया रहाटकर, भागवत कराड आणि धैर्यशील पाटील यांच्या नावांची चर्चा सुरू आहे.